საქართველოს ენერგეტიკის მინისტრი კახი კალაძე აცხადებს, რომ საქართველოს კარი ღიაა ყველა კომპანიისთვის, ადამიანისთვის, ვისაც აქვს ინტერესი ენერგეტიკის დარგის მიმართ. "ექსპო ჯორჯიაში", კონფერენციაზე - "ჰიდროტექ საქართველო" სიტყვით გამოსვლისას ვიცეპრემიერმა განაცხადა ასევე, რომ . ხელისუფლება ყველაფერს გააკეთებს, რათა მაქსიმალურად იქნას ათვისებული ის რესურსები, რაც ქვეყანას გააჩნია.
"საქართველო პატარა ქვეყანაა, მაგრამ მდიდარია წყლის რესურსებით. 25 000 მდინარეა და 300 საინტერესოა ჰიდროპოტენციალის მიმართულებით. ჩვენ ყველაფერს გავაკეთებთ, რომ ეს იყოს მაქსიმალურად ათვისებული, რათა საქართველო გახდეს ენერგოდამოუკიდებელი ქვეყანა. ჩვენ ძალისხმევას არ ვიშურებთ, რომ საქართველო უფრო მიმზიდველი გავხადოთ ინვესტორებისთვის და ბევრი ინვესტორია დაინტერესებული, რომ ამ კუთხით განახორციელოს ინვესტიციები", - განაცხადა კალაძემ.
მისივე თქმით, საქართველოში ენერგეტიკის მიმართულებით ასეთი მასშტაბური ინვესტიციები, ასეთი აღმშენებელობა 70-იანი წლების მერე არ განხორციელებულა.
"მინდა გითხრათ, რომ ჩვენ კარი ღიაა ყველა კომპანიისთვის, ადამიანისთვის, ვისაც ინტერესი აქვს ამ დარგის მიმართ და მე დარწმუნებული ვარ, რომ ჩვენი ურთიერთათანამშრომლობა, მეგობრობა იქნება ნაყოფიერი", - განაცხადა კახა კალაძემ.
კონფერენცია საქართველოში მეორედ იმართება.
