ანაკლიის პორტის უკან 600 ჰექტარზე თავისუფალი ინდუსტრიული ზონა გაკეთდება, - ამის შესახებ ჟურნალისტებს ეკონომიკისა და მდგრადი განვითარების მინისტრმა დიმიტრი ქუმსიშვილმა განუცხადა.
საქართველოს პარლამენტში "აბრეშუმის გზის ფორუმის" მეორე დღის ფარგლებში ღონისძიებები მიმდინარეობს. მინისტრის თქმით, ფორუმის შედეგად ბევრი პროექტი დარჩება საქართველოს.
,,ხელი მოეწერება ძალიან მნიშვნელოვან პროექტს, რომელიც ტყიბულში უნდა განხორციელდეს და ეს არის 100 მილიონზე მეტი საინვესტიციო ღირებულების პროექტი. ასევე, ჩვენ ვილაპარაკეთ სატრანზიტო პოტენციალსა და იმ შესაძლებლობებზე, რომელიც ტრანზიტმა უნდა მოიტანოს. ეს იქნება ანაკლიის ღრმაწყლოვანი პორტი, რომელიც ჯამურად რამდენიმე მილიარდი ინვესტიციაა. ანაკლიის პორტის უკან, ასევე გაკეთდება 600 ჰექტარზე თავისუფალი ინდუსტრიული ზონა, რომელიც ასევე შექმნის დამატებით სამუშაო ადგილებს”, - განაცხადა ქუმსიშვილმა.
მისივე თქმით, თავისუფალი ინდუსტრიული ზონის შესახებ არსებული კანონი კარგია, თუმცა საჭიროებს დახვეწას.
,,თუმცა დღეს ეს კანონი არის, რომელიც იძლევა შესაძლებლობას, რომ საქართველოში აწარმოოს პროდუქცია და შემდეგ შეიტანოს ევროპაში", - დასძინა მინისტრმა.
