სამხრეთ კორეის რესპუბლიკაში ევროპისა და აზიის სამთო კურორტების რიგით მე-2 კონფერენცია მიმდინარეობს, რომელიც ტურიზმის მსოფლიო ორგანიზაციის ეგიდით ტარდება. კონფერენციაში 500-მდე დელეგატი მონაწილეობს, მათ შორის არის საქართველოს დელეგაციაც.
მნიშვნელოვანია, რომ საქართველოს მხარემ 2017 წელს რიგით მე-3 ევროპისა და აზიის სამთო კურორტების კონფერენციის მასპინძლობის უფლება მოიპოვა.
კონფერენციაზე, საქართველოს ეკონომიკისა და მდგრადი განვითარების სამინისტროს შპს “მთის კურორტების განვითარების კომპანიის” ხელმძღვანელმა ალექსანდრე ონოფრიშვილმა მონაწილეებს გააცნო საქართველოს სამთო-სათხილამურო კურორტების (გუდაურის, ბაკურიანის, მესტიის, გოდერძის) პოტენციალი, სახელმწიფოს როლი სათხილამურო კურორტების განვითარებაში და ისაუბრა საინვესტიციო გარემოზე.
ალექსანდრე ონოფრიშვილის თქმით, კონფერენცია განსაკუთრებით მნიშვნელოვანია გამოცდილების გაზიარების კუთხით.
„მნიშველოვანია გამოცდილების გაზიარება თუ როგორია თანამედროვე მიდგომები და ტენდენციები საბაზო და ტურისტული ინფრასტრუქტურის დაგეგმარების მხრივ, რა ახალი ტურისტული პროდუქტები ვითარდება სამთო კურორტებზე სეზონის გახანგრძლივების მიმართულებით და რა ინოვაციური მეთოდები გამოიყენება სამთო კურორტების საერთაშორისო ბაზრებზე პოზიციონირების მიმართულებით. კონფერენცია ასევე წარმოადგენს ძალიან კარგ შესაძლებლობას ინვესტორთა მოსაზიდად ბიზნესის ამ სფეროში“, - აცხადებს ალექსანდრე ონოფრიშვილი.
კონფერენციაზე, ასევე იმყოფება საქართველოს ეკონომიკისა და მდგრადი განვითარების სამინისტროს სსიპ “ტურიზმის ეროვნული ადმინისტრაციის” ხელმძღვანელი გიორგი ჩოგოვაძე.
ჩიგოვაძემ შეხვდრები გამართა მსოფლიოს ტურიზმის ორგანიზაციის ხელმძღვანელთან ტალებ რიფაისთან და სამხრეთ კორეის ტურიზმის მინისტრთაან ბატონ ჩხვე გვანციკთან.
საქართველოს “რეკონსტრუქციისა და განვითარების კომპანიის” დირექტორმა ლევან ყარალაშვილმა კი, კონფერენციის ფარგლებში საქმიანი შეხვედრები გამართა საერთაშორისო დონის ექსპერტებთან.
