ოპოზიციონერი დეპუტატის, აკაკი ბობოხიძის განცხადებით, 2016 წლის საპარლამენტო არჩევნებამდე ყოველი წამი ხელისუფლების რეალური სახის ჩვენებას უნდა დაეთმოს.
უმცირესობის სხდომაზე, 2016 წლის ბიუჯეტის პროექტის განხილვისას, ბობოხიძემ მთავრობის საქმიანობა მკაცრად გააკრიტიკა და განაცხადა, რომ დასავლეთ საქართველოს შიმშილი ელოდება, რადგან ხალხს საზამთროდ ძირითადი საკვების მარაგი არ აქვს.
მისი ცნობით, იმერეთში ხვნა-თესვა დაგვიანებით ხდება, რადგან სანამ კახეთი არ მორჩება, მანამდე იმერეთი ტექნიკას ელოდება.
„სამი წლის მანძილზე, ქვეყანაში რამდენი ტექნიკა შემოიყვანეთ? - უმცირესობის სხდომაზე ივანიშვილის ფინანთა მინისტრი ნოდარ ხადური არ მობრძანდა, რადგან კოალიციიის მიერ გაცემულ დაპირებებზე პასუხისმგებლობა მას ეკისრება. არჩევნებამდე ყოველი წამი ამ ხელისუფლების რეალური სახის ჩვენებას უნდა დაეთმოს, რადგან თქვენ დაპირებებს არ ასრულებთ. ქეთი დოლიძე ამბობდა, რომ ხელისუფლებაში „ქართული ოცნების“ მოსვლის შემთხვევაში, თითოეულ სოფელს 5 მილიონი ლარი გამოეყოფოდა. მგონი, დოლიძე მათემატიკაში კი არა, ვერაფერში ვერ ერკვევა, მაგრამ ისიც მიკვირს, ივანიშვილი მილიონერი როგორ გახდა, რადგან ხელისუფლება ამბობს, ესა თუ ის საკითხი სწორად ვერ დავთვალეთო. ივანიშვილმა სერიოზული ეკონომიკური ოპერაცია ჩატარა და აფიორა დაგვიდგა, რისი საშუალებითაც საქართველო მისი საკუთრება გახდა. ივანიშვილი თაღლითია“, - განაცხადა ბობოხიძემ.
უმცირესობის სხდომას ფინანსთა მინისტრის მოადგილე გიორგი კაკაურიძე ესწრება, რომელიც ოპოზიციონერ დეპუტატებს ბიუჯეტის პარამეტრებს აცნობს.
