ენერგეტიკის მინისტრმა სამწლიანი მუშაობა ტექნიკურ უნივერსიტეტში შეაჯამა. კახა კალაძემ „ღია მმართველოს“ ფარგლებში ენერგეტიკაში მიმდინარე მოვლენებზე, მიღწეულ შედეგებზე და სამომავლო გეგმებზე ისაუბრა.
მინისტრი მოუწოდებს სტუდენტებს აქტიურად ჩაერთონ პროცესებში. ასევე მიმართა პროფესორ-მასწავლებლებს და მოუწოდა, პროფესია ენერგეტიკოსის პრესტიჟი გაზარდონ.
„ენერგეტიკა დღეს არის დარგი, რომელიც განიცდის აღმავლობას და ხდება ქვეყანაში ერთ-ერთი ძლიერი და მნიშვნელოვანი მიმართულება. ამ პროცესში პრინციპულად მნიშვნელოვანია ახალი სისხლი, სტუდენტების და ახალგაზრდა პრაქტიკოსების ჩართულობა. თქვენ უნდა დანერგოთ და აითვისოთ ენერგეტიკაში ახალი ტექნოლოგიები. თქვენ უნდა უზრუნველყოთ სისტემის გამართული და უხარვეზო მუშაობა. გახადოთ პროცესები გამჭვირვალე და პროგრესირებადი. საბოლოო ჯამში, ჩვენ მივიღებთ ქვეყნის განვითარებაზე ორიენტირებულ სფეროს, რის შედეგებსაც მომავალი თაობა დაინახავს.. მივმართავ ყველა თაობის პროფესორ-მასწავლებლებსა და მეცნიერებს, დავდგეთ ერთად და გავზარდოთ პროფესია ენერგეტიკოსის პრესტიჟი, რათა ახალმა თაობამ ამ მიმართულებით შექმნას მომავალი“, - განაცხადა კალაძემ.
როგორც მინისტრმა აღნიშნა, ენერგეტიკის უწყების მთავარი მიღწევა უწყებაში პიროვნული ინტერესებისა და პოლიტიკური რეალიების გამიჯვნაა. მისი თქმით, უწყებაში მიმდინარე პროცესები გამჭვირვალე და სტაბილურია, რაც ენერგეტიკის სფეროში განხორციელებულმა ინვესტიციებმა განაპირობა.
“დღეს ჩვენი მთავარი მიღწეული შედეგი არის ის გარემო, სადაც გავმიჯნეთ პიროვნული ინტერესები და პოლიტიკური რეალიები. პროცესები არის გამჭვირვალე და სტაბილური, რასაც ხელი შეუწყო ამ დარგში განხორციელებულმა ინვესტიციებმა. ჩვენ ძალიან აქტიურად ვთანამშრომლობთ სხვადასხვა საერთაშორისო ორგანიზაციასთან, ძალიან ბევრი მნიშვნელოვანი პროექტი ხორციელდება, ბევრი განხორციელდა და ძალიან დიდი და მასშტაბური პროექტების განხორციელებაა დაგეგმილი. ხშირად ვიმეორებ და დღესაც გავიმეორებ, რომ 70-იანი წლების შემდეგ, საქართველოს ენერგეტიკაში ასეთი აღმავლობა, ასეთი მასშტაბური ინვესტიციები არ განხორციელებულა, ეს, რა თქმა უნდა, თითოეული ჩვენგანის დამსახურებაა”, – განაცხადა კალაძემ.
