პრემიერ-მინისტრი ირაკლი ღარიბაშვილი ტექნოლოგიური ინსტიტუტის მშენებლობაში მხარდაჭერისათვის ყოფილ პრემიერს მადლობას უხდის.
ტექნოლოგიური ინსტიტუტისა და თანამედროვე ტექნოლოგიების განვითარების სამეცნიერო-საგანმანათლებლო ცენტრის მშენებლობასთან დაკავშირებით მთავრობის ადმინისტრაციაში გამართულ შეხვედრაზე ღარიბაშვილმა განაცხადა, რომ აღნიშნული პროექტის მხარდამჭერია საქველმოქმედო ფონდი "ქართუ".
პრემიერის განცხადებით, პროექტი ჩვენი ქვეყნისთვის ძალიან მნიშვნელოვანია.
,,პირველ რიგში, მინდა, გამოვყო ბიძინა ივანიშვილის როლი ამ საქმეში, როგორც ინიციატორის, ასევე, გია დვალის როლი არის მნიშვნელოვანი. მინდა აღვნიშნო, რომ ამ საქმის წამოწყება საქართველოში იყო ბატონი ბიძინას ინიციატივა. პროექტს მთლიანად დააფინანსებს ფონდი "ქართუ". ასე რომ, მადლიერებით მინდა აღვნიშნო მისი წვლილი. ამ ორი პროექტის ჯამური ღირებულება შეადგენს ნახევარ მილიარდ დოლარს და მჯერა, რომ ეს იქნება ძალიან მნიშვნელოვანი პროექტი ჩვენი ქვეყნისთვის", - განაცხადა ირაკლი ღარიბაშვილმა.
შეგახსენებთ, ტექნოლოგიური ინსტიტუტის მშენებლობასთან დაკავშირებით, პარლამენტში კანონპროექტია შესული.
