საგზაო შემთხვევების შემცირების ვალდებულება, საქართველომ ევროკავშირთან ასოცირების შესახებ შეთანხმების გაფორმებით აიღო, - ამის შესახებ ეკონომიკისა და მდგრადი განვითარების მინისტრმა დიმიტრი ქუმსიშვილმა სასტუმრო "თბილისი მარიოტში" განაცხადა, სადაც საგზაო მოძრაობის უსაფრთხოების ეროვნული სტრატეგიისა და სამოქმედო გეგმის პრეზენტაცია მიმდინარეობს.
,,კარგად გვაქვს გაცნობიერებული, რომ საგზაო უსაფრთხოების ეროვნული სტრატეგია უნდა იყოს ჩვენი ქვეყნის განვითარების ის განუყოფელი ნაწილი, რომელმაც უნდა მოახერხოს როგორც ადამიანების სიცოცხლის გადარჩენა, ასევე სწორი ეკონონიკური განვითარება. სამწუხაროდ, წლების განმავლობაში საგზაო შემთხვევები იზრდება, მაშინ როცა ევროპასთან ასოცირების ნაწილში გვაქვს გარკვეული ვალდებულებები, რათა აღნიშნული რაოდენობა შემცირდეს”, - განაცხადა მინისტრმა.
მისივე თქმით, აღნიშნული სტრატეგია სხვადასხვა სამთავრობო უწყებების ერთობლივი მუშაობის შედეგად მომზადდა და მათი კოორდინაციისთვის შესაბამისი მაკოორდინირებელი საბჭო უნდა შეიქმნას. კერძოდ, ქუმსიშვილის თქმით, ეს უწყებებია რეგიონული განვითარების სამინისტრო, ეკონონიკის სამინისტრო, შინაგან საქმეთა სამინისტრო, განათლების სამინისტრო და ჯანდაცვის სამინისტრო.
რეგიონული განვითარებისა და ინფრასტრუქტურის სამინისტრო საგზაო მოძრაობის უსაფრთხოების ეროვნული სტრატეგიისა და სამოქმედო გეგმის პრეზენტაციას მართავს. ღონისძიება სასტუმრო "თბილისი მარიოტში" უწყების ხელმძღვანელმა ნოდარ ჯავახიშვილმა გახსნა. მისი თქმით, საგზაო უსაფრთხოების ეროვნული სტრატეგის ფარგლებში შემუშავებულია 5 წლიანი სამოქმედო გეგმა, რომელიც შესაბამისი ღონისძიებების გატარებას 2015-2020 წლებში ითვალისწინებს.
