28 სექტემბერს ,  წმინდა ასურელი მამის იოსებ ალავერდელის ხსენების დღეს ყოვლადწმინდა სამების საკატედრო ტაძარში, ჩვილთა საყოველთაო მე-40 ნათლობა გაიმართება.

საპატრიარქოს ახალგაზრდული ცენტრიდან "ძლევაის" ინფორმაციით, სრულიად საქართველოს კათოლიკოს-პატრიარქის ნათლული კიდევ 1 357 ჩვილი გახდება. მონათლულებს საჩუქრად ნათლობის მოწმობა და ჯვარი გადაეცემათ. ნათლობა სამების ტაძარში დღის მეორე ნახევარში დაიწყება. 
ნათლობის დასრულების შემდეგ, დაახლოებით 20:00 საათისთვის, ტაძარში პატრიარქი მიბრძანდება და ნათლულებს დალოცავს.
დღეისთვის სრულიად საქართველოს კათოლიკოს პატრიარქს 24 642 ნათლული ჰყავს. ისინი ჯვარდაწერილი წყვილების ოჯახში მესამე და მომდევნო შვილები არიან. 
წინა, 39-ე საყოველთაო ნათლობა 22 მაისს, წმინდა მღვდელმთავარ ნიკოლოზისა და წმინდა შიო მღვიმელის ხსენების დღეს გაიმართა. ჩვილთა პირველი საყოველთაო ნათლობა კი ყოვლადწმინდა სამების საპატრიარქო ტაძარში 2008 წლის 19 იანვარს შედგა. 
კათოლიკოს-პატრიარქის ინიციატივის მიზანი, ქვეყანაში დემოგრაფიული მდგომარეობის გაუმჯობესებაა