დღეს, 23 სექტემბერს, საგარეო საქმეთა მინისტრის მოადგილე დავით დონდუა გერმანიის ელჩს საქართველოში, ბეტინა კადენბახს შეხვდა.
საგარეო უწყების ინფორმაციით, შეხვედრაზე საუბარი შეეხო საქართველოს კონფლიქტის მოგვარების პოლიტიკას, ჟენევის მოლაპარაკებების მიმდინარეობასა და გერმანიის როლს, 2016 წელს ეუთო-ს თავმჯდომარეობის კონტექსტში.
დავით დონდუამ ელჩს გააცნო საქართველოს ოკუპირებულ რეგიონებში განვითარებული მოვლენები, მათ შორის, საოკუპაციო ხაზის გასწვრივ არსებული რთული ჰუმანიტარული ვითარება.
განსაკუთრებული აქცენტი გააკეთა ჟენევის საერთაშორისო დისკუსიების მნიშვნელობასა და მონაწილეთა მიერ მოლაპარაკებების ფორმატისა და დღის წესრიგის პატივისცემაზე.
მინისტრის მოადგილემ ხაზი გაუსვა, გერმანიის, როგორც ეუთო-ს მომავალი თავმჯდომარე ქვეყნის, როლს საქართველოში კონფლიქტის მშვიდობიანი გადაწყვეტის საქმეში.
თავის მხრივ, გერმანიის ელჩმა კიდევ ერთხელ დაადასტურა საქართველოს სუვერენიტეტისა და ტერიტორიული მთლიანობის პატივისცემა.
ბეტინა კადენბახმა აღნიშნა გერმანიის დაინტერესება, როგორც ეუთო-ს მომავალმა თავმჯდომარე ქვეყანამ, აქტიური როლი ითამაშოს საქართველოში კონფლიქტის დარეგულირების საქმეში.
