ეკონომიკისა და მდგრადი განვითარების მინისტრის, დიმიტრი ქუმსიშვილის განცხადებით, 2016 წლის ბიუჯეტი 3%-იან ეკონომიკურ ზრდასა და 4%-იან ინფლაციაზე იქნება გათვლილი.
,,ამ წუთში შემიძლია გითხრათ მხოლოდ 2 ციფრი – 3%-იანი ზრდა და 4%-იანი ინფლაცია. თუმცა, მე ვფიქრობ, რომ ყველა დანარჩენი პარამეტრის გახმოვანება არის ფინანსთა მინისტრის პრეროგატივა", - განაცხადა ქუმსიშვილმა ჟურნალისტებთან და დასძინა, რომ კანონმდებლობის თანახმად, მთავრობის სხდომაზე, თვის ბოლომდე უნდა იქნას მიღებული მომავალი წლის ბიუჯეტის პირველი ვერსია.
საქართველოს ეკონომიკისა და მდგრადი განვითარების მინისტრმა დღესა ინოვაციებისა და ტექნოლოგიების სააგენტოს ხელმძღვანელთან, ირაკლი ქაშიბაძესთან ერთად, ოქროყანაში მაღალი ტექნოლოგიებისა და ინოვაციების განვითარების ცენტრის (ტექნოლოგიური პარკი) სამშენებლო სამუშაოები დაათვალიერა. როგორც დიმიტრი ქუმსიშვილმა აღნიშნა, პირველი ტექნოპარკი საქართველოში წლის ბოლოსთვის გაიხსნება.
