ტელეკომპანია "მაესტროს" ერთ-ერთი მეწილე გია გაჩეჩილაძე აცხადებს, რომ ტელეკომპანია ,,მაესტოს” გაკოტრებას ყველანაირად შეეწინააღმდეგება. იგი არხის მართვაში გადასაცემად პარტნიორებს 10 მილიონი აშშ დოლარის საბანკო გარანტიას სთავაზობს.

"ამ კომპანიაში ძალიან ბევრი სისხლი მაქვს ჩაქცეული და ყველანაირად შევეწინააღმდეგები, რომ მაესტროს გაკოტრება არ დავუშვა. მთელი საქართველოს გასაგონად ვიძახი, მე ვარ მაესტროს გადამრჩენელი, როგორც ფინანსურად, ისე მორალურად, თუმცა პარტნიორები რატომ გაურბიან ჩემ წინადადებას, ჩემთვის უცნობია. აქამდე ყოველთვის თავს ვიკავებდი საჯარო განცხადებებისგან, მაგრამ ახლა, როცა სასამართლოში შევიდა ტელეკომპანიის გაკოტრების შესახებ განცხადება, ნერვებმა აღარ გამიძლო. მინდა იცოდეს მთელმა საზოგადოებამ და საქართველომ, რომ მე მინდა "მაესტროში" შესვლა მართვით და მინდა ის დავამსგავსო იმ ტელეკომპანიას, რომლის ღირსიც არის ქართული საზოგადოება. ყველაფერს გავაკეთებ იმისთვის, რომ "მაესტრო" არ გაკოტრდეს და იყოს თავის მოწოდების სიმაღლეზე. ის უნდა იყოს წამყვანი, დამოუკიდებელი, უფრო გემოვნებიანი და ისეთი ტელევიზია, რომელიც დღეს ქართულ საზოგადოებას ეკადრება. დღეს კი, ის ამ სტანდარებს ვერ აკმაყოფილებს. მე აბსოლუტურად სხვანაირი წარმომიდგენია "მაესტროს" ეთერი, ხოლო ამ დროს, ის არის "რუსთავი 2"-ის და "იმედის" "გადამღერება", - ", - განაცხადა ჟურნალისტებთან გია გაჩეჩილაძემ.

მისი ინფორმაციით, მიმდინარეობს მოლაპარაკება ინვესტორებთან და მათგან 10 მილიონიანი საბანკო გარანტია იქნება წარმოდგენილი.