საქართველოს პრეზიდენტმა მიხეილ სააკაშვილმა სოფელ მისაქციელში ინდივიდუალური გამრიცხველიანების პროცესი დაათვალიერა.
ქვეყნის პირველი პირი მისაქციელში ენერგეტიკის მინისტრ ალექსანდრე ხეთაგურთან ერთად იმყოფებოდა. პრეზიდენტი ხეთაგურისგან გამრიცხველიანების კუთხით ზოგადად ქვეყანაში არსებული ვითარებითაც დაინტერესდა და მას ამ პრობლემის დროულად მოგვარებისკენ მოუწოდა.
"საერთო მრიცხველების გამო მეზობელი მეზობელს გადაეკიდა, ნათესავი ნათესავს, ამიტომ, ეს პრობლემა რაც შეიძლება მალე უნდა მოვაგვაროთ", - განაცხადა სააკაშვილმა.
აღნიშნულის გარდა, ქვეყნის პირველი პირი ენერგეტიკის მინისტრისგან ელექტროენერგიის ტარიფის საკითხითაც დაინტერესდა. როგორც მას ხეთაგურმა განუმარტა, ელექტროენერგიის გადასახადი საქართველოში არსებულ ტარიფთან შედარებით მხოლოდ სომხეთში, რუსეთსა და აზერბაიჯანშია უფრო დაბალი.
"იმ სახელმწიფოებში კი, რომლებსაც საკუთარი ნავთობი არ გააჩნიათ, ელექტროენერგიის ტარიფი იმაზე მაღალია, ვიდრე ჩვენთან", - განაცხადა ხეთაგურმა.
აღსანიშნავია, რომ სოფელ მისაქციელში ინდივიდუალური მრიცხველის მონტაჟი ერთ თვეში, მთლიანად საქართველოს მასშტაბით კი 2013 წლის დასაწყისში დასრულდება.
