ლარის დასტაბილურება უნდა დაიწყოს საშუალოვადიან პერსპექტივაში, - ამის შესახებ პრემიერ-მინისტრმა ირაკლი ღარიბაშვილმა ჟურნალისტებს მთავრობის ეკონომიკურ გუნდთან და ეროვნული ბანკის პრეზიდენტ გიორგი ქადაგიძესთან სამუშაო შეხვედრის შემდეგ განუცხადა.
"ბოლო რამდენიმე კვირაა უშუალოდ მე ვხელმძღვანელობ ამ საკოორდინაციო შეხვედრების ჩატარებას. დღეს მორიგი შეხვედრა გავმართეთ. მოვისმინე როგორც ეროვნული ბანკის, ასევე ფინანსთა სამინისტროს პოზიციები, მათი ხედვები ლართან მიმართებაში. ორივეს პოზიცია არის ერთი და იგივე მაკროეკონომიკურ პარამეტრებთან დაკავშირებით. ისინი თანხმდებიან, რომ ლარის კურსი არის დღეს უკვე ასე ვთქვათ, პიკში. როგორც ეროვნული ბანკის, ასევე ფინანსთა სამინისტროს პროგნოზებით, ლარის დასტაბილურება უნდა დაიწყოს საშუალოვადიან პერსპექტივაში", - განაცხადა პრემიერ-მინისტრმა.
პრემიერმა აღნიშნა, რომ მთავარია სიმშვიდის შენარჩუნება.
"მინდა საზოგადოებას მოვუწოდო, ყველას, ვინც დაინტერესებულია ამ თემით, მთავარია ახლა ჩვენ შევინარჩუნოთ სიმშვიდე, აღარ ავყვეთ აჟიოტაჟს და ემოციებს. დანარჩენ პროცესს ჩვენ ეროვნულ ბანკთან ერთად ვმართავთ და უახლოეს პერიოდში მოსალოდნელია სიტუაციის დარეგულირება და დასტაბილურება", - განაცხადა ღარიბაშვილმა.
მისივე თქმით, თუ საჭირო გახდა მოხდება ეროვნული ბანკის რეზერვების გამოყენებაც. ასევე, ფინანსთა სამინისტროს მხრიდან, საჭიროების შემთხვევაში, მოხდება ბიუჯეტის გადახედვა.
სამუშაო შეხვედრას მთავრობის ეკონომიკისა და მდგრადი განვითარების მინისტრი დიმიტრი ქუმსიშვილი, ფინანსთა მინისტრი ნოდარ ხადური, ეკონომიკური საბჭოს მდივანი გიორგი გახარია და ეროვნული ბანკის პრეზიდენტი გიორგი ქადაგიძე დაესწრნენ.
