ფინანსური ზედამხედველობის სააგენტოს საბჭოს თავმჯდომარედ ირაკლი კოვზანაძე აირჩიეს. პარლამენტში შეხვედრა რამდენიმე წუთის წინ დასრულდა. ახალი საბჭო პარლამენტს სააგენტოს ხელმძღვანელის კანდიდატს წარუდგენს. სააგენტოს ხელმძღვანელის კანდიდატად ,,პროგრეს ბანკის” ყოფილი დირექტორი კოტე სულამანიძეა წარდგენილი. საფინანსო ზედამხედველობის სააგენტოს საბჭო დაკომპლეტებულია და უფლებამოსილია, შეუდგეს მუშაობას, -ამის შესახებ, პარლამენტის დღევანდელ პლენარულ სხდომაზე დავით უსუფაშვილმა საბჭოს წევრების არჩევის შემდეგ განაცხადა.
მიღებული გადაწყვეტილებით, საბჭოს წევრები გახდნენ: ეფრემ ურუმაშვილი ხუთი წლის ვადით, ხოლო ეკატერინე გალდავა, ირაკლი კოვზანაძე და საშა ტერნესი შვიდი წლის ვადით.
"ეროვნული ბანკის შესახებ" ახალი კანონის მიხედვით, ეროვნული ბანკიდან საფინანსო სექტორის ზედამხვედველობის ფუნქციის გამოყოფასა და ახალი სააგენტოს ამოქმედებასთან დაკავშირებული ღონისძიებები ცვლილებების ძალაში შესვლიდან ერთი თვის ვადაში უნდა განხორციელდეს, კანონი "საკანონმდებლო მაცნეში" 10 სექტემბერს გამოქვეყნდა.
პარლამენტმა 3 სექტემბერს, "ეროვნული ბანკის შესახებ" კანონში განხორციელებულ ცვლილებებთან დაკავშირებით პრეზიდენტის შენიშვნები და პროექტი არ გაიზიარა და მის მიერ გამოყენებული ვეტო დაძლია. 10 სექტემბერს საქართველოს პრეზიდენტმა, გიორგი მარგველაშვილმა მას ხელი მოაწერა, რის შემდეგაც "საკანონმდებლო მაცნეში" გამოქვეყნდა და ძალაში შევიდა.
