,,თუ კიდევ ერთხელ დასჭირდა ქვეყანას და ვალუტას, რომ მოხდეს ცენტრალური ხელისუფლებიდან ბიუჯეტის კორექტირება, ჩვენ ამის განხილვასაც დავიწყებთ, თუმცა დღეს არსებული პარამეტრებით, ამის საჭიროება არ არის", - ამის შესახებ დიმიტრი ქუმსიშვილმა ჟურნალისტებს ბიზნესასოციაციის მიერ ორგანიზებული შეხვედრის დაწყებამდე განუცხადა.
მისივე თქმით, არსებული პრობლემის მოგვარების გზებზე საქართველოს მთავრობა ეროვნულ ბანკთან ერთად მუშაობს და შესაბამისი ღონისძიებებზე მსჯელობს.
"მაკროეკონომიკური პარამეტრებით, დღეს ჩვენ ვართ ლარის გადაფასებაში, ანუ კურსი არის უფრო გაუფასურებული, ვიდრე მაკროეკონომიკური პარამეტრები გვაჩვენებს. მოსახლეობისთვის მინდა აღვნიშნო, რომ ეს არის რეალური ციფრები, რომელიც ჩვენ გვიჩვენებს ექსპორტის და იმპორტის ბალანსს. ასევე, გვიჩვენებს იმ შემოდინებებს, რომელიც ქვეყანაშია. შესაბამისად, ყველა ამ ციფრიდან გამომდინარე, ჩვენს ვალუტაზე, წინა წელთან შედარებით, ზეწოლა შემცირებულია 100-180 მილიონი დოლარით, შესაბამისად ჩვენ ვამბობთ, რომ საშუალოვადიან პერიოდში აუცილებლად მოხდება ლარის გამყარება. ასევე, მინდა აღვნიშნო, რომ იმ შემთხვევაში, თუ მოლოდინების ნაწილში ბაზრის მოთამაშეებმა ვერ მოახერხეს სწორი მოლოდინების ფორმირება, ეროვნული ბანკი თავის მხრივ, ხოლო ცენტრალური ხელისუფლება თავის მხრივ გაატარებენ ყველა საჭირო ზომას, რომელიც გასატარებელია. მათ შორის - თუ კიდევ ერთხელ დასჭირდა ქვეყანას და ვალუტას, რომ მოხდეს ცენტრალური ხელისუფლებიდან ბიუჯეტის კორექტირება, ჩვენ ამის განხილვასაც დავიწყებთ, თუმცა დღეს არსებული პარამეტრებით, ამის საჭიროება არ არის", - განმარტა მინისტრმა.
