უკრაინის პრეზიდენტის ვებ-გვერდზე ამჯერად კიდევ ერთი პეტიცია განთავსდა- ამჯერად ოდესის გუბერნატორის, მიხეილ სააკაშვილის გადადგომის მოთხოვნით. პეტიციის ავტორი ვინმე ვიქტორ სტეპანენკოა, რომლის მტკიცებითაც, 3 თვის მანძილზე, რაც სააკაშვილი გუბერნატორად დაინიშნა, მას თავისი დაპირებებიდან არცერთი არ შეუსრულებია. სტეპანენკოს მტკიცებით, ოდესაში არანაირი რეფორმები არ ტარდება, კორუფციას კი ახალი გუბერნატორი მხოლოდ ტელეინტერვიუებით ებრძვის.
„ერთადერთი, რაც სააკაშვილს კარგად ეხერხება, პიარი და თვითრეკლამაა. მისი მოღვაწეობა საქართველოში უკვე შეაფასეს და მის წინააღმდეგ სისხლის სამართლის საქმეც აღძრეს,“-ნათქვამია პეტიციის ტექსტში.
მანამდე პეტრო პოროშენკოს ოფიციალურ ვებ-გვერდზე პეტიცია სააკაშვილის პრემიერობის მოთხოვნით განთავსდა, რომელსაც ხელი 25 ათასზე მეტმა ადამიანმა მოაწერა.
