მთავრობამ „შესაფუთი ხის მასალის რეგულირების წესი“ დაამტკიცა, რომელიც ძალაში 1-ელი ნოემბრიდან შევა. სოფლის მეურნეობის სამინისტროს ინფორმაციით, „ტექნიკური რეგლამენტის - „შესაფუთი ხის მასალის რეგულირების წესის“ დამტკიცების თაობაზე“ საქართველოს მთავრობის დადგენილების პროექტის მიღება განპირობებულია იმით, რომ „სურსათის უვნებლობის სფეროში ყოვლისმომცველი სტრატეგიისა და საკანონმდებლო მიახლოების პროგრამის დამტკიცების თაობაზე“ საქართველოს მთავრობის 2010 წლის 28 დეკემბრის N1756 განკარგულებით საქართველოს აღებული აქვს ვალდებულება მოახდინოს სურსათის უვნებლობის სფეროში საქართველოს კანონმდებლობის ჰარმონიზაცია ევროკავშირის კანონმდებლობასთან, რომლის უზრუნველსაყოფად შემუშავდა წარმოდგენილი მთავრობისდადგენილების პროექტი.
დღეის მდგომარეობით, საქართველოში არარსებობს საერთაშორისო ვაჭრობისას გამოსაყენებელი შესაფუთი ხის მასალის (შხმ) დამუშავების, დამზადების, შეკეთების და მარკირების მარეგულირებელი ნორმატიული აქტი.
წარმოდგენილი პროექტი ეფუძნება გაეროს სურსათისა და სოფლის მეურნეობის ორგანიზაციის (UN FAO) მცენარეთა დაცვის საერთაშორისო კონვენციის (IPPC) ფიტოსანიტარიული ზომების საერთაშორისო სტანდარტს - ISPM 15 „სახელმძღვანელო საერთაშორისო ვაჭრობაში ხის შესაფუთი მასალის რეგულირებისათვის“.
პროექტში დეტალურად არის გაწერილი შესაფუთი ხის მასალის (შხმ) მწარმოებელი ბიზნესოპერატორის ვალდებულებები. კერძოდ შხმ-ს მწარმოებელი ბიზნესოპერატორი უნდა დარეგისტრირდეს დადგენილი წესის შესაბამისად, უნდა უზრუნველყოს შხმ-ს შესაბამისობა ამ წესის მოთხოვნებთან, მისი დამუშავების, დამზადების, შეკეთების და მარკირების ეტაპებზე, აწარმოოს შხმ-ს და ხის მასალის შეძენის და რეალიზაციის აღრიცხვა და შესაბამისი დოკუმენტაცია, მოახდინოს შხმ-ს მარკირება დამუშავების ტიპის შესაბამისად, სურსათის ეროვნულ სააგენტოს წარუდგინოს სწორი ინფორმაცია მარკირებული შხმ-ს რაოდენობისა და დამუშავების ტიპის შესახებ, შეასრულოს სურსათის ეროვნული სააგენტოს რეკომენდაციები.
პროექტში ასევე, გაწერილია მოთხოვნები იმ საწარმოს მიმართ სადაც ხორციელდება შხმ-ს დამუშავება, დამზადება, შეკეთება და მარკირება.
