თბილისის მერიაში მიწათსარგებლობის გენერალური გეგმის შემუშავება-განახლების საკონკურსო კომისიის მორიგი შეხვედრა გაიმართა.
როგორც ,,ჯი-ეი-ენჯს” თბილისის მერიიდან აცნობეს, შეხვედრაზე განიხილეს დარჩენილი ექვსი კონკურსანტის ნამუშევრები, რომელთა პრეზენტაცია რამდენიმე კვირის წინ გაიმართა.
კონკურსანტების ნამუშევრების შესახებ ექსპერტებმა თავიანთი მოსაზრებები წარმოადგინეს. მიწათსარგებლობის გენერალური გეგმის კონკურსში გამარჯვებული მომდევნო კვირას გამოვლინდება.
თბილისის მერიის არქიტექტურის სამსახურმა მოქმედი მიწათსარგებლობის გენერალური გეგმის ანალიზი 2015 წლის იანვარში დაასრულა, რის შედეგადაც შეიქმნა გადაუდებელი აუცილებლობა მომხდარიყო ქალაქის ტერიტორიულ-სივრცითი განვითარების ახალ გამოწვევებსა და პრიორიტეტებზე ორიენტირებული გენგეგმის შემუშავება-განახლება.
თბილისის მერიის ინფორმაციით, გენგეგმის შემუშავება-განახლების პროცესში ჩართულია საერთაშორისო საკონსულტაციო კომპანია PWC (PricewaterhouseCoopers), რომელიც მსოფლიოს მასშტაბით 1000 დარგობრივი სპეციალისტით არის წარმოდგენილი და 20 ქალაქის, მათ შორის, ლიონის, ნიუ ორლეანის და რიჰარდის გენერალური გეგმების შემუშავებაში აქვს მონაწილეობა მიღებული. ამასთან, ამ დროისთვისPWC ბერლინის ქალაქგეგმარების პროექტზე მუშაობს. აღნიშნული მომსახურების საფასური შეადგენს 400 000 ამერიკულ დოლარს.
საკონკურსოწინადადებების მიღება 2015 წლის 01 აგვისტოს დასრულდა. შემოსული 11 განაცხადიდან კი მეორე ტურში გადასვლა ექვსმა კონკურსანტმა შეძლო. საკონკურსო კომისია უფლებამოსილია წინადადებების შეფასების შედეგად 3 გამარჯვებული გამოავლინოს.
წინასაპროექტო მოსაზრების (ხედვის) შესყიდვის ღირებულება კანონმდებლობით გათვალისწინებული გადასახადების ჩათვლით I ადგილისათვის - 50 000 ლარს, II ადგილისათვის - 30 000 ლარს, ხოლო III ადგილისათვის - 20 000 ლარს შეადგენს.
