2015 წელს აჭარაში 374 მლნ 20 ათასი დოლარის ინვესტიცია განხორციელდება. როგორც აჭარის ფინანსთა და ეკონომიკის მინისტრი დავით ბალაძე განმარტავს, 2015 - 2020 წლებში რეგიონში განსახორციელებელი პროექტებიდან 1 მლრდ 342 მლნ 400 ათასი დოლარის მოცულობის ინვესტიციის შემოდინებაა დაგეგმილი. მინისტრის თქმით, აჭარის რეგიონის საინვესტიციო პორთფელის ჯამური მოცულობა 1 მლრდ 845 მლნ 100 ათასი დოლარია.
დავით ბალაძის ინფორმაციით, აჭარაში მშენებარე სასტუმროების საერთო საინვესტიციო ღირებულება 704,5 მლნ დოლარს შეადგენს.
უფრო კონკრეტულად კი, აჭარაში ამ დროისათვის ერთ-ერთი უმსხვილესი პროექტის განხორციელება მიმდინარეობს. „მეტრო სითი“, - ეს არის, ახალ ბულვარში, 90 მლნ აშშ დოლარის ინვესტიცია, რომელსაც კომპანია „მეტრო ატლას ჯორჯიას“ ახორციელებს და რომელიც 1500 ადამიანის დასაქმებას ითვალისწინებს.
”ახალ ბულვარში გარდა „მეტრო სითის“ პროექტისა ასევე ჯამში 50 მლნ აშშ დოლარის ღირებულების 2 ახალი ინვესტიცია მიმდინარეობს. შპს „მეტრო ატლას ჯორჯია“ და შპს „ეიარ მერიდიანსი“ არანაკლებ 220 - 200 ნომრიანი სასტუმროსა და აპარტამენტების მშენებლობას განახორციელებენ. უკვე დასრულებული სასტუმროების ოპერირებას კი მსოფლიო ბრენდები უზრუნველყოფენ. ორივე პროექტში რეგიონში მცხოვრები 800-ზე მეტი მოქალაქე დასაქმდება”,- აღნიშნა დავით ბალაძემ.
მინისტრის თქმით, სულ ეხლახანს ბათუმში 40 მილიონი აშშ დოლარის ღირებულების სასტუმრო “ORBI BEACH TOWER” -ის მშენებლობა დაიწყო.
ასევე, კომპანია „ალიანსი“ რეგიონში 30 მილიონი ლარის ინვესტიციას განახორციელებს. საუბaრია 100 ნომრიანი სასტუმროს მშენებლობაზე.
”მალე ახალი დიდი ინვესტიცია დაიწყება. ბათუმში კიდევ ერთი მსოფლიო ბრენდი - „მარიოტი“ შემოდის.
იმავდროულად, გმირთა ხეივანში 3 ახალი ინვესტიციის განხორციელება დაიწყო: შპს „DAR BUILDING”-ი 22 მლნ აშშ დოლარის ღირებულების პროექტს, ხოლო შპს „სახლი ხეივანში“ 9 მლნ აშშ დოლარის ღირებულების პროექტს ახორციელებს”- აღნიშნა დავით ბალაძემ.
ცნობილია ასევე ისიც, რომ „მეგა პალასი“ რეგიონში 6 მილიონი აშშ დოლარის ღირებულების პროექტს ქმნის.
შეგახსენებთ, რომ 2015 წლის მეორე კვარტალში აჭარაში კერძო პირდაპირი ინვესტიციის მოცულობა წინა წლის ანალოგიურ პერიოდთან შედარებით 47%-ით გაიზარდა და 89.0 მლნ აშშ დოლარი შეადგინა.
აჭარის ფინანსთა და ეკონომიკის მინისტრის განმარტებით, 2012 წლის შემდეგ არაერთი მსხვილი პროექტი განხორციელდა. 2012 წლიდან 2015 წლამდე 16 დიდი სასტუმროს მშენებლობა დაიწყო, რომელთა ჯამური საინვესტიციო ღირებულება 566 მლნ აშშ დოლარს შეადგენს.
