2015 წლის იანვარ-ივნისში აჭარაში 44 %-ით მეტი კერძო პირდაპირი ინვესტიცია განხორციელდა ვიდრე გასული წლის ანალოგიურ პერიოდში.
აჭარის ფინანსთა და ეკონომიკის სამინისტროს ინფორმაციით, 2015 წლის პირველ ნახევარში აჭარის ავტონომიური რესპუბლიკის ტერიტორიაზე 165.3 მლნ აშშ დოლარის ოდენობის კერძო პირდაპირი ინვესტიცია განხორციელდა, საიდანაც 134.4 მლნ აშშ დოლარი უცხოური, ხოლო 30.9 მლნ აშშ დოლარი ადგილობრივი კერძო პირდაპირი ინვესტიცია იყო.
დავით ბალაძის ინფორმაციით, 6 თვის განმავლობაში აჭარაში განხორციელებული კერძო პირდაპირი ინვესტიციები, წინა წლის ანალოგიურ მაჩვენებელთან შედარებით გაზრდილია 44%-ით.
2015 წლის პირველი ნახევარში აჭარაში განხორციელებული ინვესტიციები მუნიციპალიტეტების მიხედით შემდეგნაირად გადანაწილდა: ბათუმი - 61%-ი, შუახევი - 13%-ი, ხულო - 12 %-ი, ხელვაჩაური - 9 %-ი, ქობულეთი - 4 %-ი, ქედა - 1 %-ი.
სტატისტიკური ინფორმაციის მიხედვით, აჭარის ტერიტორიაზე განხორციელებული კერძო პირდაპირი ინვესტიციები ეკონომიკური სექტორების მიხედვით შემდეგნაერად გადანაწილდა: ტურიზმი (41%), ენერგეტიკა (34%) და მშენებლობა (19%), სხვა დანარჩენი დარგები (6%).
აჭარის ავტონომიური რესპუბლიკის ტერიტორიაზე განხორციელებული კერძო პირდაპირი უცხოური ინვესტიციები 134.4 მილიონ აშშ დოლარს შეადგენს.
როგორც აჭარის ფინანსთა და ეკონომიკის სამინისტროში აცხადებენ, უცხოური ინვესტიციების უმეტესი ნაწილი ტურიზმის (46%), ენერგეტიკისა (42%) და მშენებლობის (8%) დარგებში განხორციელდა.
2015 წლის პირველი 6 თვის მონაცემებით ყველაზე მსხვილი ინვესტორი ქვეყნებია: თურქეთი (44%), ნორვეგიადა ინდოეთი (30%).
