ესპანურმა ავიაკომპანია „Vueling Airlines“-მა 2016 წლიდან, შესაძლოა, თბილისი-ბარსელონას მიმართულებით ავიარეისების განხორციელება დაიწყოს. როგორც სამოქალაქო ავიაციის სააგენტოში განმარტავენ, „Vueling Airlines“-ი ბარსელონადან თბილისის მიმართულებით რეგულარული საჰაერო მიმოსვლის დაწყების შესაძლებლობას სწავლობს უკვე სწავლობს.
საქართველოსთან მიმართებაში ავიაკომპანიის გეგმების, აგრეთვე ქვეყნის საავიაციო ბაზარზე ოპერირების დაწყებასთან დაკავშირებული საკანონმდებლო ჩარჩოს და თანმდევი პროცედურების გაცნობის მიზნით, სამოქალაქო ავიაციის სააგენტოში შეხვედრა უკვე შედგა, რომელშიც მონაწილეობას სააგენტოს დირექტორი გურამ ჯალაღონია, პირველი მოადგილე იგორ აფციაური, გადაყვანა-გადაზიდვების დეპარტამენტის უფროსი ალექსანდრე გაჩეჩილაძე, ავიაკომპანია „Vueling Airlines“-ის საერთაშორისო გაყიდვების აღმასრულებელი მენეჯერი ალექსანდრა სტელმაქი, „TAV Airports” ჰოლდინგის მარკეტინგის მენეჯერი სერქან ქარაჰატაი და “ტავ ჯორჯიას“ „Groundhandling“-ის მენეჯერი აკაკი ბარქაია, იღებდნენ.
„Vueling Airlines“-ის წარმომადგენელმა საავიაციო ხელისუფლების პირველი პირებისგან მიიღო ამომწურავი ინფორმაცია მისთვის საინტერესო საკითხების ირგვლივ.
ავიამიმართულების შესწავლისა და დაგეგმვის მიზნით, „Vueling Airlines“-ის წარმომადგენლებმა შეხვედრები უკვე გამართეს ტურიზმის ეროვნულ ადმინისტრაციასთან და საქართველოში მოქმედ მსხვილ ტურ-ოპერატორებთან.ავიაკომპანია „Vueling Airlines“-თან ძირითად მომლაპარაკებელ მხარეს „TAV Airports” ჰოლდინგი და “ტავ ჯორჯია“ წარმოადგენენ.
წინასწარი ინფორმაციით, ბარსელონიდან თბილისის მიმართულების პირდაპირი საჰაერო მიმოსვლის განხორციელებას „Vueling Airlines“ 2016 წლის ზაფხულის სეზონზე - კვირაში ორი სიხშირით, Airbus 320 ტიპის საჰაერო ხომალდით გეგმავს.
„Vueling Airlines“ 2004 წელს დაარსდა და მგზავრებს საკმაოდ დაბალი ტარიფებით მგზავრობის საშუალებას აძლევს.
