ეროვნული ბანკის პრეზიდენტი გიორგი ქადაგიძე ეროვნული ვალიუტის გაუფასურების მიზეზებზე საუბრობს და აცხადებს, რომ ისეთი პატარა ეკონომიკისთვის, როგორიც საქართველოა, გაცვლითი კურსის ხელოვნურად გამყარება თითქმის შეუძლებელია.
ქადაგიძემ სასტუმრო „თბილისი რუმსში“ მიმდინარე საერთაშორისო კონფერენციაზე - „ევროპის ახალი გეოპოლიტიკური ლანდშაფტი: უსაფრთოხება, ეკონომიკური შესაძლებლობები, თავისუფლება და ადამიანური ღირსება ფრონტისპირა ქვეყნებში“ განაცხადა ასევე, რომ რეგიონში ყველა ქვეყანამ ეკონომიკური შოკი განიცადა, რაც იმას ნიშნავს, რომ საქართველოში ექსპორტი შემცირდა.
სებ-ის პრეზიდენტის განმარტებით, ძირითადი დაფინანსების წყაროები შემცირდა და დეფიციტი განიცადა, შედეგად, ქვეყნის ეროვნული ვალუტაც გაუფასურდა და დისბალანსის ამოვსება ვერ შეძლო.
„საქართველოს ეკონომიკა ძალიან დოლარიზებულია. მოსახლეობის 60 %-ს სესხები უცხოურ ვალუტაში აქვთ, ხოლო შემოსავალი ადგილობრივ ვალუტაში. პროპორცია გაიზარდა. ყველაფერს სოციალური პრობლემები დაერთო.. რეალობაში, ერთადერთი გრძელვადიანი გადაწყვეტილება ქვეყანაში კვლავ შემოსავლის ნაკადების დაბრუნება იქნება. ისეთი პატარა ეკონომიკისთვის, როგორიც საქართველოა, თითქმის შეუძლებელია რაღაც ხელოვნურად გაცვლითი კურსის გამყარება, დაფიქსირება. თუ დაიწყებ ამას, ეს ნიშნავს იმას, რომ ბაზრის საწინააღმდეგოდ თამაშობ და ამის გაკეთება ნამდვილად შეუძლებელია“, - აღნიშნა ქადაგიძემ.
მისი თქმით, ეკონომიკის ისტორიაში მსგავსი შემთხვევების ათასობით მაგალითი არსებობს. მას ამის დასტურად ყაზახეთისა და აზერბაიჯანის მაგალითი მოჰყავს.
,,აღნიშნულმა ქვეყნებმა გაცვლითი კურსით საკუთარი რეზერვებით შენარჩუნება და გამყარება ვერ შეძლო. შესაბამისად, მათ კურსის გაუფასურებასთან შეგუება მოუწიათ. ეს არის ტენდენცია. გაუფასურების მიზეზი კი ეკონომიკური შოკია, რომელიც ჩვენ განვიცადეთ“, - დასძინა ქადაგიძემ.
