ქართული თაფლის ხარისხის საერთაშორისო სტანდარტებთან მიახლოებას მეფუტრეობის განვითარების პროგრამა შეუწყობს ხელს. ამის შესახებ მთავრობის დღეგვანდელ სხდომაზე სოფლის მეურნეობის მინისტრმა ოთარ დანელიამ განაცხადა.
მეფუტკრეობის განვითარების პროგრამის მიმდინარეობით პრემიერ-მინისტრი ირაკლი ღარიბაშვილი დაინტერესდა. მისი შეფასებით, ეს არის ძალიან კარგი პროექტი.
,,სამეცნიერო-კვლევითი მიმართულება, რომელიც გულისხმობს მუხურში საველე სადგურის აღდგენას, უკვე დაწყებულია და მიმდინარე წლის ბოლომდე შევა ექსპლუატაციაში. მიუხედავად ამისა, უკვე შევიძინეთ რამოდენიმე სკა იმ იშვიათი ქართული ჯიშის ფუტკრისთვის, რომელიც არის მნიშვნელოვანი და ჩვენ გვინდა ხელი შევუწყოთ ამ მიმართულებით. დღეს ჩვენ წარმოდგენილი გვაქვს ასევე მეფუტკრეობის კოოპერირების ხელშეწყობის პროგრამა, რომელიც ითვალისწინებს 164 კოოპერატივის ხელშეწყობას, მათ შორის 80 არის მაღალმთიან რეგიონებში. ძალიან მნიშვნელოვანია ეს პროექტი, ვინაიდან ეს ითვალისწინებს კეთილსაიმედოობის კუთხით იდენტიფიკაციის და მიკვლევადობას თითოეული სკის საქართველოში, ასევე საერთაშორისო სტანდარტების დანერგვას. მე ადრეც მოგახსენეთ, რომ ჩვენ გვქონდა გარკვეული ხარვეზები ხარისხთან მიმართებაში, არის ნაკლოვანებები წარმოების და წარმადობის კუთხით, ვინაიდან ჩვენ გაცილებით ნაკლები მოგვყავს საშუალოდ შეწონილ ერთ სკაზე, ვიდრე ეს უნდა იყოს საერთაშორისო სტანდარტებით და ყველა ამ პროცედურის ხელშეწყობას ითვალისწინებს ეს პროექტი", - განაცხადა დანელიამ.
