აგვისტოში წინა თვესთან შედარებით საქართველოში ინფლაციის დონემ 1,0 პროცენტი შეადგინა. ”საქსტატის” ინფორმაციით, მოცემულ პერიოდში ინფლაციის მაჩვენებლის ფორმირებაზე ძირითადი გავლენა იქონია ფასების ცვლილებამ შემდეგ ჯგუფებზე:
სურსათი და უალკოჰოლო სასმელები: ფასები გაიზარდა 2,0 პროცენტით, რაც თვის ინფლაციის მთლიან მაჩვენებელში 0,58 პროცენტული პუნქტით აისახა. ჯგუფზე ფასების ზრდა მეტწილად განპირობებული იყო რძე, ყველსა და კვერცხზე ფასების 9,4-პროცენტიანი მატებით, ასევე ხილსა და ყურძენზე ფასების ზრდით (8,6 პროცენტი). საანგარიშო პერიოდში ფასები შემცირდა ბოსტნეულსა და ბაღჩეულზე (-0,7 პროცენტი);
საცხოვრებელი სახლი, წყალი, ელექტროენერგია, აირი და სათბობის სხვა სახეები: წინა თვესთან შედარებით ფასები გაიზარდა 4,4 პროცენტით, რამაც თვის ინფლაციის მთლიან მაჩვენებელში 0,33 პროცენტული პუნქტის ტოლი წვლილი შეიტანა. ჯგუფში ფასების დინამიკა ძირითადად განაპირობა ელექტროენერგიაზე ფასების 11,4 პროცენტით ზრდამ.
