2-5 სექტემბერს, ქალაქ რიგაში, ლატვიაში, სსიპ მეწარმეობის განვითარების სააგენტოს ორგანიზებითა და ხელშეწყობით ქართული კომპანიები ეროვნულ ნაწარმს სასმელი და საკვები პროდუქტების საერთაშორისო გამოფენაზე „Riga Food 2015” წარადგენენ.

„Riga Food 2015” ბალტიისპირეთის მასშტაბით სასმელი და საკვები პროდუქტების სექტორში წლის უმსხვილესი ღონისძიებაა, რომლის საგამოფენო სივრცე მსოფლიოს 37 ქვეყნიდან  682-ზე მეტ კომპანიას აერთიანებს,  ვიზიტორთა რაოდენობა კი 37 783-ს აჭარბებს.

 ქართული სტენდის ქვეშ წვენების, ჩაის, თხილის, ლიმონათის, მინერალური წყლის,  ენერგეტიკული სასმელის, ლუდის წარმოებისა და ასევე, კვების მრეწველობაში მოღვაწე ქართული კომპანიების პროდუქცია განთავსდება, კონკრეტულად, კომპანიები „კულა“ (საკონსერვო პროდუქცია, ხილის წვენები, ჯემები, მურაბები, კომპოტები), „გეოპლანტი“ (სხვადასხვა სახეობის ქართული ჩაი), „Nutex“, „Euronuts“, „საგა-2008“ (თხილი ნაჭუჭით, თხილის გული), „ზედაზენი“  (ლიმონათი, ლუდი, ენერგეტიკული სასმელი) და „ წყალი მარგებელი“ (მინერალური და წყაროს წყალი) საკუთარ პროდუქციას უცხოელ ვიზიტორებს გააცნობს.

მეწარმეობის განვითარების სააგენტო მსგავსი ტიპის ღონისძიებებს პერმანენტულად უწევს ორგანიზებას და აღნიშნული სახის გამოფენებში მონაწილეობით ხელს უწყობს  ქართული პროდუქციის პოპულარიზაციას, ამასთანავე, სათანადო პლატფორმას ქმნის ევროკავშირის ბაზარზე, მოცემულ შემთხვევაში კი ბალტიისპირეთში ახალი სავაჭრო პარტნიორების შეძენისა და კონტაქტების დამყარების კუთხით.