ბოლო ერთი კვირაა, იმპორტირებულ პროდუქტზე მაღაზიებში ფასმა მოიმატა. სავაჭრო ობიექტების წარმომადგენლები სექტემბერში კიდევ უფრო გაძვირებაზე საუბრობენ. ისინი მიიჩნევენ, რომ ამ პროცესის კიდევ უფრო დამძიმებას ხელს დენის ტარიფზე ფასის მატებაც შეუწყობს. საფასო ცვლილება ეხება საკონდიტრო ნაწარმს, თამბაქოს, კვერცხს და კიდევ სხვა სახის პროდუქტებს.
როგორც ”ჯი-ეიჩ-ენს” სუპერმარკეტ ”ბი მარტის” მენეჯერმა ლელა სულხანიშვილმა განუცხადა, ბოლო ერთი კვირაა ტკბილეულზე ფასმა 10 %-ით მოიმატა, სექტემბერში კი, კვერცხის საბითუმო ღირებულება 2 თეთრით გაიზრდება.
”მომწოდებლები, აბსოლუტურად თითქმის ყველა პროდუქციაზე გვეუბნებიან, რომ ფასი პროდუქტზე გაგვიძვირდება. ეს ეხება სიგარეტს, ტკბილეულს, კვერცხს, ასე ყველას ჩამოთვლა მიჭირს. ზემოთ აღნიშნულ ყველა პროდუქტზე ფასი სექტემბრიდან კიდევ აიწევს. ტკბილეულის ფასმა ბოლო ერთი კვირაა 10 %-ით მოიმატა. ასევე გაიზარდა ღირებულება კვერცხზე, ასევე ნიკორას ძეხვებზე, სოსისებზე აიწია ფასმა, დაახლოებით ერთი კვირის წინ. სადღაც 2 ლარით არის მომატებული ასაწონი ძეხვის და სოსისის ღირებულება. ეტაპობრივად აძვირებენ. არ ვიცი რა არის მიზეზი, ალბათ ლარის გაუფასურების გამო ხდება ეს. რაც შეეხება დენის ტარიფს, თუ მოიმატებს, რა ქმა უნდა, ხარჯი მოგვემატებადა პროდუქტზე ფასი კიდევ გაიზრდება”, - აცხადებს ლელა სულხანიშვილი.
იმპორტირებულ პროდუქტზე ფასის მატებას ადასტურებენ სუპერმარკეტ ”ჯი ელ მარკეტშის”. მისი დამფუძნებლის თქმით, დისტრიბუციამ გაზარდა ფასი, თუმცა ეს მათ პროდუქციაზე ჯერ არ ასახულა. გიორგი მელიქიძე ,,ჯი-ეიჩ-ენთან” აცხადებს, რომ ელექტროენერგიის გაძვირების შემდეგ, ეს გარდაუვალი გახდება.
,,დისტრიბუციამ გაზარდა ფასი, ჩვენ არ გაგვიზრდია. რაც შეეხება დენის ტარიფზე ფასის მატებას, ამ შემთხვევაში ჩვენ შევეცდები პროდუქტზე ფასის მატება მინიმალური იყოს”, - აცხადებს გიორგი მელიქიძე.
