27 აგვისტოს საჯარო სხდომაზე საქართველოს ენერგეტიკისა და წყალმომარაგების მარეგულირებელმა ეროვნულმა კომისიამ სს „თელასის“ მიერ 2015-2016 წლებში განსახორციელებელი ინვესტიციების მოცულობა განსაზღვრა. კომისიის გადაწყვეტილების თანახმად, სს „თელასის“ მიერ კომისიასთან შეთანხმებული ინვესტიციები 2015 წლისათვის 15, 234 მილიონლარს, ხოლო 2016 წელს - 16.239 მილიონ ლარს შეადგენს. სს „თელასს“ წლების მიხედვით განესაზღვრა საინვესტიციო პროექტების განხორციელების ვალდებულება. კერძოდ, კომპანიამ2015 წელს 37 საინვესტიციო პროექტი, ხოლო 2016 წელს - 35 პროექტი უნდა განახორციელოს.
სს „თელასის“ 2015-2016 წლების საინვესტიციო გეგმის მიხედვით დაგეგმილია ქვესადგურების, საჰაერო გადამცემი ხაზებისა და საკაბელო მეურნეობის რეაბილიტაცია, ელექტროენერგიის კომერციული აღრიცხვის ავტომატური სისტემის განვითარება, ტრანსფორმატორების კაპიტალური რემონტი და სხვა სახის კაპიტალური ინვესტიციები.
სს „თელასის“ მიერ წარმოდგენილმა 2015-2016 წლების საინვესტიციო პროექტებმაკომისიის ელექტროენერგიტიკის დეპარტამენტში გაიარა წინასწარი ტექნიკური ექსპერტიზა და კომისიათან შეთანხმებული პროექტები მიჩნეულ იქნა როგორც საჭირო და დასაბუთებული ინვესტიცია.კომისია განახორციელებს მონიტორინგს სს „თელასის“ საინვესტიციო პროექტების მიმდინარეობასა და შესრულების ვადებზე.
სს „თელასმა“ ელექტროენერგიის განაწილების, გატარებისა და მოხმარების ტარიფების გაანგარიშების მიზნით, 2015 წლის 23 ივლისს კომისიაში წარადგინა სატარიფო განაცხადი თანდართული საინვესტიციო გეგმით. კომპანიის მიერ თავდაპირველად წარმოდგენილ იქნა მთლიანობაში 66 958 030 ლარის ღირებულების საინვესტიციო პროექტების სია, აქედან 2015 წლისათვის გათვალისწინებული იყო 32 637 23 მილიონი ლარის ინვესტიცია, ხოლო 2016 წელს 34 320 800 ლარის ინვესტიცია, თუმცა აღნიშნული მოცულობები განხილვების შედეგად დაკორექტირდა. კერძოდ, კომპანიამ მოითხოვა 2015-2016 წლებში განსახორციელებელი, ქსელზე მიერთებების უზრუნველსაყოფად საჭირო ხარჯების წინასწარ გათვალისწინება საინვესტიციო პროექტებში, რაც კომისიამ არ დააკმაყოფილა. კომისიის განმარტებით, ელექტროენერგიის გამანაწილებელ ქსელზე მიერთების საფასური, რომელსაც ქსელზე მიერთების მსურველი უხდის კომპანიას, უკვეგანსაზღვრულია შესაბამისი დადგენილებით. შესაბამისად, ამ მომსახურების ხარჯის სს „თელასის“ ტარიფში წინასწარ ასახვა, არ არის მიზანშეწონილი, ვინაიდან მისი გადახდა ხდება ინდივიდუალურად, ქსელზე მიერთების მსურველი პირის მიერ.
