საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრომ, დღეს რუსთავში აფხაზეთიდან დევნილ 6 ოჯახს საცხოვრებელი ბინები კერძო საკუთრებაში გადასცა.
დევნილთა და განსახლების მინისტრი სოზარ სუბარი, მინისტრის მოადგილე მამუკა ცოტნიაშვილი, რუსთავის ვიცე-მერი ნოდარ შეროზია, კლინიკა "გორმედის" დირექტორი გია სვანაძე და ქვემო ქართლის გუბერნატორის მოადგილე კახაბერ გუგეშაშვილი იმ დევნილ ოჯახებს ესტუმრნენ, რომელთათვისაც სამინისტრომ საცხოვრებელი ბინები დავით გარეჯის, შარტავასა და ლომოურის ქუჩებზე შეიძინა. დევნილთა და განსახლების მინისტრმა მათ ახალმოსახლეობა მიულოცა და საცხოვრებელ პირობებს ადგილზე გაეცნო.
სოზარ სუბარმა მოინახულა გურამ ბაბუციძის ოჯახი, რომელიც სოციალურად დაუცველია, მისი ძმა ილია ბაბუციძე კი საქართველოს ტერიტორიული მთლიანობისათვის ბრძოლაში გმირულად დაიღუპა და "ვახტანგ გორგასლის" I ხარისხის ორდენითაა დაჯილდოებული. მისი სახელი მინიჭებული აქვს თბილისის ერთ-ერთ ქუჩას.
"აფხაზეთიდან დევნილ პაატა ზაქარაიას ხუთსულიან ოჯახს სამინისტრომ, "სოფლად სახლის" პროექტის ფარგლებში, რუსთავში, შარტავას გამზირზე ბინა 26 000 ლარად შეუსყიდა. ბინის ღირებულება 5 000 ლარით მეტი იყო. აღნიშნული თანხა კი კლინიკა "გორმედის" ხელმძღვანელმა გია სვანაძემ დაუფინანსა. წლების განმავლობაში პაატა ზაქარაია მეუღლესთან და სამ შვილთან ერთად ქირით ცხოვრობდა. დღეს ასევე მოვინახულეთ გმირულად გარდაცვლილი ბაბუციძის ძმის ოჯახი და ქალდანების რვასულიანი ოჯახი. სამინისტრო დევნილების საცხოვრებელი სახლებით უზრუნველყოფის პროგრამას აქტიურად აგრძელებს", - განაცხადა სოზარ სუბარმა.
დევნილთა და განსახლების მინისტრმა ქალაქისა და მხარის ხელმძღვანელ პირებთან ერთად დღეს მერაბ ქალდანის რვასულიანი ოჯახიც მოინახულა, რომელთაც 6 შვილი, მათ შორის 5 არასრულწლოვანი ჰყავთ. ქალდანების ოჯახს სამინისტრომ კრიტერიუმების შესაბამისად ორი ბინა, ერთი სამოთახიანი და ერთი ერთოთახიანი ბინა კერძო საკუთრებაში გადასცა.
სამინისტრომ დევნილებისათვის ქვემო ქართლის რეგიონში წელს 95, ხოლო რუსთავში 25 საცხოვრებელი ბინა შეისყიდა.
