ხვალ, 26 აგვისტოს, აშშ-ში ქალთა თანასწორობის დღე აღინიშნება. ეს დღე პოლიტიკოსისა და საზოგადო მოღვაწის ბელა აბზუგის ინიციატივით, 1971 წელს დაწესდა და ამერიკელი ქალების მთავარ მონაპოვარს, 1920 წლის 26 აგვისტოს საარჩევნო ხმის მინიჭების უფლებას მიეძღვნა. ერთი წლით ადრე , 1919 წელს, საქართველოს დამფუძნებელ კრებაში ხუთმა ქალმა იყარა კენჭი. ელისაბედ ბოლქვაძესთან ერთად პირველი ქართველი ქალი პარლამენტარები იყვნენ ელეონორა ტერ-პარსეგოვა-მახვილაძისა, მინადორა ტოროშელიძე, ქრისტინე შარაშიძე, ანა (ოლღა) სოლოღაშვილი.
ბათუმის მერიის საზოგადოებასთან ურთიერთობის სამსახურისა და ბათუმის გენდერის მედიაცენტრის ინიციატივით, 26 აგვისტოს, 11 საათზე, ზ.გორგილაძის ქუჩაზე მდებარე 'ვარდების სკვერში", სოლიდარობის ნიშნად და გადაწყვეტილების მიმღებ პოზიციებზე ქალთა მოსვლის მოთხოვნით აქცია „აირჩიე თანასწორობა“ გაიმართება.
