პრეზიდენტის ადმინისტრაციაში მიიჩნევენ, რომ მთავრობისა და ეროვნული ბანკის კოორდინირებული მუშაობის შედეგად გაკეთებული განცხადებები მნიშვნელოვნად უზრუნველყოფს ბაზარზე ნეგატიური მოლოდინების განეიტრალებას. ეკონომიკურ საკითხებში საქართველოს პრეზიდენტის მრჩეველმა გიორგი აბაშიშვილმა ჟურნალისტებთან განაცხადა, რომ გამოინახება გზები ლარის კურსის მერყეობის შესაჩერებლად.
,,ყველაზე მნიშვნელოვანია გაგრძელდეს და გაძლიერდეს კოორდინირებული მუშაობა საქართველოს მთავრობასა და ეროვნულ ბანკს შორის. ვფიქრობ, გამოინახება გზები, რომ ლარის კურსის მერყეობა, ერთი მხრივ, გონივრული, საბაზრო მექანიზმებით იქნას შეჩერებული, მეორე მხრივ კი, მოხდეს მნიშვნელოვანი დანაკარგების თავიდან აცილება. საჭიროა ნეგატიური მოლოდინების განეიტრალებაც, ამის მიღწევას კი მნიშვნელოვანად შეუწყობს ხელს მთავრობასა და ეროვნულ ბანკს შორის კოორდინირებული მუშაობა", - განაცხადა გიორგი აბაშიშვილმა.
მისი განმარტებით, მთავრობასა და ეროვნულ ბანკს შორის თანამშრომლობა როგორც აუცილებელი ქმედებების შეთანხმებულად განხორციელებას, ისე კოორდინირებული განცხადებების გაკეთებას გულისხმობს.
"ვფიქრობ, მთავრობისა და ეროვნული ბანკის ერთობლივი, კოორდინირებული მუშაობის შედეგად გაკეთებული განცხადებები მნიშვნელოვნად უზრუნველყოფს ბაზარზე ნეგატიური მოლოდინების განეიტრალებას. ამავდროულად, საჭროა, რომ კოორდინაცია მუდმივ რეჟიმში შენარჩუნდეს, რაც მნიშვნელოვნად შეუწყობს ხელს არა მხოლოდ მოკლევადიანი, არამედ საშუალო და გრძელვადიანი ეკონომიკური პროგნოზირების გაუმჯობესებას, ეს კი მომავალში მსგავსი ტიპის რყევების ალბათობას მნიშვნელოვნად შეამცირებს", - აღნიშნა აბაშიშვილმა.
