საქართველოს ენერგეტიკისა და წყალმომარაგების მარეგულირებელმა ეროვნულმა კომისიამ სს „თელასის“ ტარიფში შემავალ კომპონენტებთან დაკავშირებით მესამე საჯარო მოსმენა გამართა. კომისიამ საზოგადოებას წარუდგინა საოპერაციო დანახარჯებისა და ელექტროენერგიის შესყიდვის კომპონენტების შესახებ, ტარიფებისა და ეკონომიკური ანალიზის დეპარტამენტის მიერ მომზადებული წინასწარი პროექტები. შეხვედრა საჯარო იყო და ესწრებოდნენ დარგის ექსპერტები, სს „თელასის“, არასამთავრობო სექტორისა და მედიის წარმომადგენბელი და სხვა დაინტერესებული პირები.

საჯარო მოსმენაზე წარმოდგენილი პრეზენტაცია სს „თელასის“ ტარიფში შემავალ კომპონენტებთან დაკავშირებით განთავსებულია კომისიის ვებ გვერდზე:

http://gnerc.org/ge/sadjaro-skhdomebi/sadjaro-skhdomebis-shedegebi-presrelizi/sxdomis-shedegebi/16502

ნებისმიერ დაინტერესებულ პირს აქვს შესაძლებლობა წინადადებები და მოსაზრებები წარადგინოს კომისიაში 2015 წლის 31 აგვისტოს ჩათვლით.

კომისია შეახსენებს საზოგადოებას, რომ დაწყებულია საჯარო ადმინისტრაციული წარმოება „ელექტროენერგიის ტარიფების შესახებ“ საქართველოს ენერგეტიკის მარეგულირებელი ეროვნული კომისიის 2008 წლის 4 დეკემბრის N33 დადგენილებაში ცვლილებების შეტანის თაობაზე ნორმატიული ადმინისტრაციულ-სამართლებრივი აქტის - კომისიის დადგენილების გამოსაცემად.

დადგენილების გამოცემის შესახებ მოსაზრებების წარდგენის ბოლო ვადად განსაზღვრულია 2015 წლის 31 აგვისტოს 18:00 საათი, ხოლო კომისიის მიერ გადაწყვეტილების მიღების- დადგენილების გამოცემის ბოლო ვადად - 2015 წლის 18 დეკემბერი.