დაღესტნის კარაბუდახკენსკის რაიონში უცნობმა პირებმა გაზგამანაწილებელი სადგურების ოპერატორის პუნქტზე შეიარაღებული თავდასხმა განახორციელეს. თავდასხმა ამ დილით მოხდა და მასში 10 შეიარაღებული ადამიანი მონაწილეობდა.
გავრცელებული ინფორმაციით, ბოროტმოქმედებმა ოპერატორის მეუღლე და მცირეწლოვანი შვილი იარაღის მუქარით პუნქტიდან გამოიყვანეს, შემდეგ მოწყობილობა გამოიტანეს და ყველაფერი ადგილზე იარაღის ჯერით დაცხრილეს და ააფეთქეს. ბოროტმოქმედებმა ასევე გადაწვეს ოპერატორის სახლი.
დაღესტნის სამართალდამცავების ინფორმაციით, ბოროტმოქმედებმა ასევე დაცხრილეს ფიჭური კავშირგაბმულობის ერთ-ერთი ოპერატორის ანძა, რომელიც გაზგამანაწილებელი პუნქტის სიახლოვეს მდებარეობდა.
ბოროტმოქმედთა მოქმედების შედეგად დარღვეულია კავშირი რვა გაზგამანაწილებელ სადგურთან. ამჟამად შემთხვევის ადგილზე სამართალდამცავები და სპეციალისტები მუშაობენ, რომლებიც თავდასხმის შედეგების აღმოფხვრას ცდილობენ.
მასალის გამოყენების პირობები
