ეკონომიკის საკითხებში ექპერტის გიგა ბედინეიშვილის შეფასებით, ახლო მომავალში ლარი კიდევ დასუსტდება. მისი განცხადებით, ლარის მიმართ დადებითი ტენდენციები არ ჩანს.
”მე მეშინია, რომ კარგად არ წავა საქმე შემდეგ რამდენიმე თვეში, კვირაში. იმიტომ, რომ ლარის მიმართ დადებით ტენდენციებს ვერ ვხედავ. ვერც ქვეყნის გარეთ და ვერც ქვეყნის შიგნით. რამდენიმე ჩვენს მეზობელ ქვეყანაში დევალვაცია მოხდა. ისინი ნავთობზე არიან ჩამოკიდებულნი და ნავთობზე ფასის მიმართ აშკარად დაბალ მიმავალი ტენდენციაა ყველგან და ეს მათზე მოქმედებს და რა თქმა უნდა ჩვენზეც”, - განაცხადა გიგა ბედინეიშვილმა.
მისივე თქმით, ქვეყანაში ხდება არასწორი ეკონომიკური - პოლიტიკური ნაბიჯების გადაგმა, რაც არის მიმართული ახალი ბარიერების აღმართვისკენ და რთულ გარე ფაქტორებს დამატებული შიდა არასწორი პოლიტიკა, მდგომარეობას კიდევ უფრო ამძიმებს და ლარს აუფასურებს.
,,ჩვენს სუსტ ეკონომიკას სუნქვის საშუალებას არ ვაძლევთ. თუ სწორი ეკონომიკური პოლიტიკა გვექნება, შოკებსაც უკეთესად გავუძლებთ. გარე ფაქტორებსაც უფრო გავუმკლავდებით. კარგი, დერეგულირებული და მოქნილი ეკონომიკაა საჭირო. არასწორი პოლიტიკა არის ნავთი, რომელიც ესხმევა ცეცხლს, რომელიც დანთებულია გარე ფაქტორებით”, _ განმარტავს ”ჯი-ეიჩ-ენთან” საუბრისას თავისუფალი და აგრარული უნივერსიტეტის ბიზნეს სკოლის დეკანი გიგა ბედინეიშვილი.
