2015 წლის აჭარის რესპუბლიკური ბიუჯეტი 8 მლნ 314 ათასი ლარით იზრდება და მიმდინარე წლის ბიუჯეტის საპროგნოზო მოცულობა 183 მლნ 639 ათასი ლარით განისაზღვრება. აჭარის ფინანსთა და ეკონომიკის სამინისტროს ინფორმაციით, გაზრდილი ბიუჯეტით სხვადასხვა პროგამები დაფინანსდება, მათ შორის ჯანდაცვის პროგრამები 8 323,2 ათასი ლარით, განათლების, კულტურისა და სპორტის სამინისტროს დაფინანსება 1 668,2 ათასი ლარით, გზებისა და სამელიორაციოს სისტემების მართვის დეპარტამენტის დაფინანსება 2 923,9 ათასი ლარით იზრდება. ქედის მუნიციპალიტეტის ინფრასტრუქტურისთვის კი დამატებით 1 200,00 ათასი ლარი დაიხარჯება.
როგორც აჭარის ფინანსთა და ეკონომიკის სამინისტროში განმარტავენ, აჭარის რესპუბლიკური ბიუჯეტის ორი კვარტლის გეგმის გადაჭარბებით შემდეგ, ბიუჯეტის კორექტირების საკითხი დღისწესრიგში დადგა და მთავრობამაც 2015 წლის აჭარის რესპუბლიკური ბიუჯეტის ზრდის გადაწყვეტილება მიიღო.
ბიუჯეტის პროექტის განხილვა აჭარის უმაღლესი საბჭოს ცალკეულ კომისიებში უკვე დაიწყო, ხოლო რეგიონის მთავარი ფინანსური დოკუმენტი საბოლოოდ დასამტკიცებლად სესიაზე სექტემბრის პირველ კვირას გავა.
2015 წლის აჭარის ა.რ რესპუბლიკური ბიუჯეტის ორი კვარტალის მონაცემები კი ასეთია:
1.შემოსულობები
აჭარის ავტონომიური რესპუბლიკის რესპუბლიკური ბიუჯეტის შემოსულობების 2015 წლის ორი კვარტლის დაზუსტებული გეგმა 72 959,8 ათასი ლარით განისაზღვრა, ფაქტიური შესრულება კი 92 879,2 ათასი ლარია, რაც გეგმის 127,3 პროცენტია. წინა წლის ანალოგიურ მაჩვენებელთან (69 867,8 ათასი ლარი) შედარებით შემოსავლების ფაქტიური შესრულება გაზრდილია 23 011,4 ათასი ლარით, ანუ 32,9 პროცენტით.
2.შემოსავლები
აჭარის ავტონომიური რესპუბლიკის რესპუბლიკური ბიუჯეტის ორი კვარტლის შემოსავლების გეგმა 67 225,8 ათასი ლარით განისაზღვრა, ფაქტიურმა შესრულებამ კი 84 816,1 ათასი ლარი შეადგინა, ანუ გეგმა შესრულებულია 126,2 პროცენტით.
წინა წლის ანალოგიურ მაჩვენებელთან (66 476,8 ათასი ლარი) შედარებით შემოსავლების ფაქტიური შესრულება 18 339,3 ათასი ლარით არის გაზრდილი, ანუ 27,6 პროცენტით.
3.გადასახადები
აჭარის ავტონომიური რესპუბლიკის რესპუბლიკური ბიუჯეტის 2015 წლის ორი კვარტლის შემოსავლების უდიდესი ნაწილი, საერთო შემოსავლების 89,3 პროცენტი,გადასახადებზე მოდის, რომელიც მხოლოდ საშემოსავლო გადასახადს მოიცავს. საანგარიშო პერიოდის საშემოსავლო გადასახადის გეგმა განისაზღვრა 60 000,0 ათასი ლარით, ფაქტიურმა შესრულებამ კი 75 728,0 ათასი ლარი შეადგინა, ანუ გეგმის 126,2 პროცენტი.საანგარიშო პერიოდის საშემოსავლო გადასახადი 2014 წლის შესაბამის მაჩვენებელთან შედარებით, რომელიც შეადგენდა 61 205,7 ათას ლარს, გაზრდილია14 522,3 ათასი ლარით ანუ 23,7 პროცენტით. გარდა ამისა დაუბეგრავი მინიმუმის სახით დაბრუნებულმა თანხამ ექვს თვეში 1 844,3 ათასი ლარი შეადგინა.
4.სხვა შემოსავლები
რესპუბლიკური ბიუჯეტის 2015 წლის ორი კვარტლის სხვა შემოსავლების გეგმა 2 239,4 ათასი ლარით განისაზღვრა, შესრულებამ კი 4 132,3 ათასი ლარი შეადგინა, ანუ გეგმის 184,5 პროცენტი.
5.არაფინანსური აქტივების (კლება)
აჭარის ა.რ რესპუბლიკური ბიუჯეტის 2015 წლის ორი კვარტლის არაფინანსური აქტივების (კლების) (გაყიდვა) გეგმა 5 734,0 ათასი ლარით განისაზღვრა, ფაქტიური შესრულებამ კი 8 063,2 ათას ლარი შეადგინა, ანუ გეგმის 140,6 პროცენტი.
