„საქართველოს ტელერადიოცენტრი“ რადიო „აფხაზეთის ხმისთვის” სიგნალის შეწყვეტასთან დაკავშირებით სპეციალურ განცხადებას ავრცელებს და „აფხაზეთის ხმისთვის” მომსახურების შეწყვეტის მიზეზს ხსნის. როგორც „საქართველოს ტელერადიოცენტრის” განცხადებიდან ირკვევა რადიოს 61 ათას 226 ლარის დავალიანება გააჩნია.
„მიმდინარე წლის 25 მარტს შპს „საქართველოს ტელერადიოცენტრსა“ და ა(ა)იპ მედია ცენტრ „ღია აფხაზეთისათვის“ (რადიო „აფხაზეთის ხმა“) შორის გაფორმდა შეთანხმება დავალიანების - 61226,46 (სამოცდაერთი ათას ორას ოცდაექვსი ლარი და ორმოცდაექვსი თეთრი) განწილვადებით ცხრა თვის ვადაში, კერძოდ, 2016 წლის 1 იანვრამდე სრულად დაფარვის შესახებ.
შეთანხმების თანახმად, 2015 წლის აგვისტომდე გადახდილი უნდა ყოფილიყო 27211,76 ლარი, თუმცა გადახდილია მხოლოდ 17720 ლარი. აქვე უნდა აღინიშნოს, რომ გადახდები ხდებოდა პერიოდულად და არა ყოველთვიურად, როგორც შეთანხმებით იყო განსაზღვრული. უნდა აღინიშნოს ისიც, რომ ხსენებული 17720 ლარიდან 9920 ლარი გადახდილი იქნა აგვისტოში.
გარდა ამისა, ასევე დარღვეულია მხარეთა შორის 2010 წლის 2 მარტს გაფორმებული და დღემდე მოქმედი N57 ხელშეკრულებით მოვალის მიერ ნაკისრი ფინანსური ვალდებულება გაწეული მომსახურების საფასურის ყოველთვიურად გადახდის შესახებ.
მიუხედავად „საქართველოს ტელერადიოცენტრის“ მიერ არაერთგზის გაგზავნილი საპრეტენზიო წერილებისა ( იხ. N09/134 11.02.2013წ; N09/405 08.10.2013წ; N09/134 11.02.2015წ. წერილები), მოვალის მხრიდან მრავალჯერ დაირღვა ნაკისრი ფინანსური ვალდებულება და გაფრთხილებებმა სასურველი შედეგი არ გამოიღო. ასევე სათანადო რეაგირება არ მოყვა თბილისის საქალაქო სასამართლოში ჩვენს მიერ სარჩელის აღძვრას. აქედან გამომდინარე, ხელშეკრულების 7.3. პუნქტის საფუძველზე, სატელევიზიო ანძებზე განთავსებულ მედიაცენტრის „ღია აფხაზეთისათვის“ რადიოგადამცემ აპარატურას შეუჩერდა ოპერატიული მომსახურება და ექსპლუატაცია და საქართველოს სამოქალაქო კოდექსის 369-ე მუხლის მოთხოვნათა შესაბამისად, უარს ვამბობთ მომსახურებაზე მოვალის მიერ დავალიანების სრულად დაფარვამდე“, - აღნიშნულია შპს „საქართველოს ტელერადიოცენტრის“ განცხადებაში.
