პრემიერ-მინისტრმა აჭარის მთავრობის თავმჯდომარესთან ერთად ბათუმში ს. ჟღენტის #1-ში მშენებარე ხუთვარსკვლავიანი სასტუმრო და გასართობი კომპლექსი მოინახულა. კომპლექსი რეგიონში ყველაზე მსხვილი საინვესტიციო პროექტია, რომელსაც ავსტრიული კომპანია "GAB Resorts Holding and Development GMBH"- ის შვილობილი კომპანია საქართველოში - შპს "GIMG" ახორციელებს.
დღეის მდგომარეობით, პროექტში უკვე გახარჯულია 60 მლნ. აშშ დოლარზე მეტი, რომლის უმეტეს ნაწილს უშუალოდ კომპანიის აქციონერთა პირდაპირი ინვესტიციები წარმოადგენს. სასტუმრო კომპლექსი შედგება 232 სხვადასხვა კატეგორიის სასტუმრო ნომრებისგან; საკონფერენციო და ბიზნეს-ცენტრით, ღია ტერასებით, სპა და ფიტნეს ცენტრით დახურულ აუზთან ერთად, ბუტიკების გალერეით, რესტორნებით, ბარებითა და კაფეებით. კომპლექსი მოიცავს ასევე გასართობ ცენტრს, კაზინოს, VIP კაზინოს, კაბარე თეატრს, ვარიეტეს, ღამის ბარებს, ბოულინგ ცენტრს, ბავშვთა და საოჯახო გართობის ცენტრს.
საცხოვრებელი კომპლექსი ,,Palm Apartments" შედგება "ლუქსის" კატეგორიის 33 აპარტამენტისა და ,,ბიზნეს" კატეგორიის 51 რეზიდენციისაგან. პროექტის მთლიანი დასრულებისათვის აუცილებელი ინვესტიციების საერთო რაოდენობა 120 მილიონ აშშ დოლარზე მეტს შეადგენს.
