"ქრისტიან-დემოკრატები" საარჩევნო კამპანიის ფარგლებში დღეს დევნილებს შეხვდნენ.
შეხვედრაზე, რომელიც ჭადრაკის სასახლეში გაიმართა, მოძრაობის ლიდერები იძულებით გადაადგილებულ პირებს არჩევნებში გამარჯვების შემთხვევაში სოციალური მდგომარეობის გაუმჯობესებას დაჰპირდნენ.
"სახელმწიფომ უნდა შეწყვიტოს დევნილებისადმი დამოკიდებულება. მათ უნდა უყურებდეს, არა როგორც მძიმე ტვირთს, რომელსაც ატარებს, არამედ ისინი უნდა განიხილოს, როგორც უზარმაზარი დადებითი პოტენციალის მქონე ადამიანები, რომელთაც ელემენტარული ხელშეწყობა სჭრიდებათ ცხოვრების თავიდან დასაწყებად", - განაცხადა პარტიის ლიდერმა გიორგი თარგამაძემ.
"ქრისტიან-დემოკრატების" თბილისის საკრებული თავმჯდომარეობის კანდიდატ ინგა გრიგოლიას შეფასებით კი, სახელმწიფოს დევნილები არ აინტერესებს.
"ამას ეს ადამიანები ყოველდღიურად გრძნობენ", - განმარტავს გრიგოლია.
აღნიშნულის გარდა, დღესვე, იძულებით გადაადგილებულ პირებთან გამართა შეხვედრა "ქრისტიან-დემოკრატების" კიდევ ერთმა წარმომადგენელმა - დიღმის ოლქში საკრებულოს მაჟორიტარობის კანდიდატმა პაატა ფოცხვერიამ. ის რკინიგზის საავადმყოფოს შენობაში ჩასახლებულ დევნილებს გაესაუბრა და მათ დახმარებას დაჰპირდა.
შეგახსენებთ, რომ საავადმყოფოს შენობაში ამჟამად 30 დევნილი ოჯახი ცხოვრობს.
