ვერსალის ნაწილს ელიტარულ სასტუმროდ გადააკეთებენ. ბევრს ოცნებაშიც კი ვერ წარმოედგინა, თუ ოდესმე ვერსალში ღამის გათევა შეეძლებდა, თუმცა სულ მალე ეს რეალობა გახდება და ფრანგი მონარქების საცხოვრისში ღამის გათევა და დასვენება შესაძლებელი იქნება.
გადაწყვეტილება არქიტექტურული კომპლექსის ადმინისტრაციამ უკვე მიიღო და სასტუმრო ვერსალის XVII საუკუნით დათარიღებულ 3 სავანეში გათავსდება. კომპლექსის სასტუმროდ ქცევას 4-დან 7 მლნ ევრომდე დასჭირდება. ამდენივე დასჭირდება შემოგარენის რეკონსტრუქციას.
ვერსალის ადმინისტრაციამ სასტუმროს შექმნაზე და მის მართვაზე ტენდერი უკვე გამოაცხადა და გამარჯვებულს ვერსალში სასტუმროს განთავსების შემდეგ მისი მართვა 60 წლის განმავლობაში მოუწევს. ტენდერში გამარჯვებულ კომპანიას ქირის სახით, კომპლექსის ადმინისტრაციისთვის, წლის განმავლობაში 300 ათასი ევროს გადახდაც მოუწევს.
ტენდერში მონაწილეობის მსურველთა განაცხადის მიღება 14 სექტემბერს დასრულდება. პროექტით უკვე დაინტერესებულია სასტუმრო ოპერატორი AccorHotels-ი. მათი გეგმის მიხედვით, მომავალი სასტუმრო მიიღებს სახელწოდებას - Hotel de l'Orangerie.
