”სითი პარკთან” დაკავშირებით, აუდიტის სამსახურის დასკვნა გასაჯაროვდა. მისი გაცნობის შემდეგ, თბილისის საკრებულოს დამოუკიდებელი დეპუტატი ალეკო ელისაშვილი კომპანიასთან ხელშეკრულების გაწყვეტას მოთხოვს. მისი აზრით, მომდევნო 10 წელი, კომპანიას ბაზარზე დარჩენის საშუალება არ უნდა მიეცეს, წინააღმდეგ შემთხვევაში იგი მზადაა საპროტესტო აქციები მოაწყოს.
”პრობლემა არის ისიც, რომ 10 წელი ”სითი პარკი” კიდევ უნდა დარჩეს ქალაქში და არაფერში - პარკინგის მოუწესრიგებლობაში უნდა აიღოს დაახლოებით 300 მილიონი. არ შეიძლება სითი პარკის ქალაქში დარჩენა. სექტემბრიდან უნდა დაესვას წერტილი თბილისის მერიის მიერ ხალხის მოტყუებას, რომ ვითომ ”სითი პარკს” რაღაცას შეაცვლევინებენ. ამ კომპანიის წინააღმდეგ სექტემბრიდან დაიწყება ძალიან სერიოზული კამპანია.”, _ აცხადებს ალეკო ელისაშვილი.
შეგახსენებთ, შპს „სითი-პარკსა“ და თბილისის მერიას შორის გაფორმებულ ხელშეკრულებაში შესატანი ცვლილებები, ხელმომწერმა მხარეებმა სექტემბრის ბოლომდე უნდა მოამზადონ. დავით ნარმანიას დავალებით, მხარეები სექტემბრის ბოლომდე უნდა მოემზადონ გონივრული და გაანგარიშებული ცვლილებების განხორციელებისთვის, ისე, რომ მხარეთა თანასწორობა უზრუნველყოფილი იყოს.
