საქართველოს ეროვნული ბანკის მიერ რეფინანსირების განაკვეთის 0.5 %-ით ზრდამ, ლარის გაუფასურებამ ბიზნესი კიდევ ერთხელ აზარალა. მათი დიდი ნაწილი ცდილობს ამ რყევებს გაუძლოს და სწორედ ამიტომ უმეტესობამ ხარჯის შემცირების მიზნით ბანკიდან სესხის დოლარში აღება არჩია, რადგან ლარში თანხის გადახდა უფრო ძვირი ჯდება.
როგორც ” ჯი-ეიჩ-ენს” მცირე ბიზნესის წარმომადგენელმა გიორგი დაბრუნდაშვილმა განუცხადა, ავეჯით მოვაჭრეებიდან თითქმის ყველას კრედიტი უცხოურ ვალუტაში აქვს აღებული. მათთვის ასე უფრო მომგებიანია.
” ლარის გაუფასურებამ თავის დროზე უკვე თავისი საქმე გააკეთა, პროდუქცია გააძვირა. ამჟამად რეფინანსირების განაკვეთის ზრდა დიდად ჩვენს მუშაობაზე არ ასახულა. 0.5 %-იანი მატება არაფერია იმასთან შედარებით, რაც მანამდე იყო”, _ აცხადებს გიორგი დაბრუნდაშვილი.
ხარჯი გაეზარდათ ავტოიმპორტიორებს. ამასთანავე გააძვირეს ავტომობილებიც.
” მერსედეს ბენცის” გაყიდვების განყოფილების უფროსის ლაშა ლომიძის თმით, მათ ამჟამად ბანკიდან კრედიტი არ აქვთ გამოტანილი, თუმცა სამომავლოდ ესენიც თანხის დოლარში აღებას ვარაუდობენ.
” რა თქმა უნდა, უარყოფით გავლენას ახდენს, პირველ რიგში ჩვენზე. მანქანების იმპორტს ვახორციელებთ და პროდუქტი ძალიან გაგვიძვირდა.
ახლა მიმდინარეობს ახალი ოფისის მშენებლობა, რისთვისაც სესხს გამოვიტანთ, ალბათ დოლარში. რეკონსტრუქცია მოხდება ძველი შენობის და იმავე ადგილას, უნივერსიტეტის ქუჩაზე ავაშენებთ ახალს”, _ განმარტავს ”მერსედეს ბენცის” გაყიდვების განყოფილების უფროსი ლაშა ლომიძე.
სავალუტო რყევების ფონზე უცხოური ვალუტა გამოსავალია ტურისტული კომპანიებისთვისაც.
როგორც ”მედეა თრეველის” გენერალურმა დირექტორმა ირაკლი გოგორიშვილმა ”ჯი-ეიჩ-ენთან” საუბრისას აღნიშნა, ბანკიდან სესხის აღებისას უპირატესობა უცხოურ ვალუტას მიანიჭა. მიზეზი წინა შემთხვევების ანალოგიურია. ნაკლები პროცენტია გადასახდელი.
” დოლარში ავიღე სესხი. რა თქმა უნდა, ეს უფრო მომგებიანი აღმოჩნდა, რადგან ლარში აღების შემთხვევაში გადასადი მეტია. რეფინანსირების განაკვეთის, ლარის გაუფასურების ზრდამ პირადად მე გადასახადი 5-10 %-ით გამიზარდა. ახლა ბანკში მეტი თანხის შეტანა მიწევს, რაც ბიზნესისთვის წამგებიანია”.
არასამთავრობო ორგანიზაცია ” საზოგადოება და ბანკების” მიერ მოწოდებული ინფირმაციით, 2015 წლის 31 ივლისის მდგომარეობით რეფინანსირების განაკვეთზე მიბმული იპოთეკური სესხი 5545 ადამიანს, ხოლო ბიზნეს სესხი 2663 იურიდიულ პირს აქვს. სულ სესხის პროცენტი 8208 ადამიანს გაუძვირდება. 2015 წლის მაისთან შედარებით იმ ადამიანების რაოდენობა, ვისაც რეფინანსირების განაკვეთზე მიბმული სესხი ჰქონდა 545-ით არის გაზრდილი.
