ქართული კომპანიების ნაწილი ”ჯი-ეიჩ-ენთან” აცხადებს, რომ რუსული ბაზარი არასტაბილური და პოლიტიზირებულია.
სწორედ ამიტომ ისინი ემბარგოს შემდეგ, პროდუქციის რუსეთში გატანას უგუნურ და სარისკო გადაწყვეტილებად აფასებენ.
”აბსოლუტურად დესტრუქციული ბაზარი არის საქართველოსთვის. ეს არის პოლიტიზირებული ბაზარი. ასე, რომ აქ რაიმე მარკეტინგული გათვლა, ან ღვინის ხარისხი სრულიად უადგილოა. ჩემი დამოკიდებულება ამ ბაზრის მიმართ უარყოფითია. ჩემი აზრით, ემბარგოს შემდეგ კიდევ რუსეთზე ღვინის გატანა შეცდომა, უგუნურება იყო”, _ აცხადებს მიკრო მეწარმე მერაბ ახობაძე.
სარისკოდ მიიჩნევენ რუსულ ბაზარზე დაყრდნობას კომპანია ”სარაჯიშვილშიც”. ისინი დაახლოებით 30-მდე ბაზარზე გადიან, მათ შორის არის რუსეთი, სადაც პროდუქციის მხოლოდ 10 % გააქვთ. მიზეზი ის რისკებია, რაც ამ ბაზარს ახასიათებს.
”რა თქმა უნდა, რუსეთი არასტაბილური ბაზარია, საფრთხეებს შეიცავს. თავიდანვე ამ ბაზარზე დიდი იმედები არ დაგვიმყარებია, რადგან არასტაბილური კლიენტები არიან, საშიში ქვეყანაა. რას გააკეთებენ, როდის შეწყვეტენ კავშირს არ იცი.
სხვადასხვა ქვეყნებში ვახდენთ პროდუქციის გატანას, ძირითადად კონიაკს ვყიდით. ჩვენი ექსპორტის 10 % რუსეთზე მიდის. აკრძალვის შემთხვევაში არ ვნახავთ დიდ ფინანსურ ზარალს, რადგან არ ვართ რუსეთზე დამოკიდებულნი, ორიენტირი გვაქვს ევროკავშირზე.
ემბარგოს მერე რუსულ ბაზარზე გასვლა სარისკო გადაწყვეტილება იყო, ნაკლებად მომგებიანი”, _ აცხადებს კომპანია ”სარაჯიშვილის” საერთაშორისო გაყიდვების მენეჯერი სანდრო საკანდელიძე.
ღვინის ეროვნული სააგენტოს მონაცემებით, 2015 წლის იანვარ-ივლისის პერიოდში საქართველოდან მსოფლიოს 35 ქვეყანაში ექსპორტირებულია 16 810 187ბოთლი (0,75 ლ) ღვინო, რაც თანხაში 47589654აშშ დოლარს შეადგენს.
საანგარიშო პერიოდის მონაცემებით, ექსპორტიორი ქვეყნების პირველი ხუთეული ასე გამოიყურება: რუსეთი 8477635 ბოთლი, ყაზახეთი 2533596, უკრაინა 1510404, ჩინეთი 984221 და პოლონეთი 921828 ბოთლი.
არასტაბილური პოლიტიკურ-ეკონომიკური მოვლენების გამო, 2 უმსხვილეს ექსპორტიორ ქვეყანაში - რუსეთსა (-59%) და უკრაინაში (-62%) ექსპორტის მკვეთრმა კლებამ, გავლენა იქონია ექსპორტის 7 თვის მონაცემებზე, რომელიც2014 წლის ანალოგიურ პერიოდთან შედარებით46%-ითაა შემცირებული.თუმცა, შედარებისთვის: იანვარში ექსპორტის კლების მაჩვენებელი იყო - 87%, 6 თვის მონაცემებით კლება იყო - 49%, ივლისის მდგომარეობით კი ექსპორტის შემცირების მაჩვენებელმა 46%-მდე დაიწია.
