2015 წლის 13-14 ივნისს, ქ. თბილისში მომხდარი სტიქიის შედეგად დაზარალებულ გადასახადის გადამხდელთა დასახმარებლად, საქართველოს ფინანსთა სამინისტრომ შეღავათები დააწესა.
უწყების ინფორმაციით, სამინისტრომ გაითვალისწინა გადასახადის გადამხდელების მდგომარეობა და ყველა ის გადამხდელი, რომელმაც, აღნიშნულის გამო, ვერ მოახერხა საგადასახადო კანონმდებლობით გათვალისწინებული ვალდებულებების შესრულება, კერძოდ, საგადასახადო დეკლარაციის კანონმდებლობით დადგენილ ვადაში წარდგენა და გადასახადების გადახდა, გათავისუფლდა საგადასახადო კოდექსით გათვალისწინებული სანქციებისაგან. კერძოდ: პირები, რომლებსაც საგადასახადო დეკლარაციის / გაანგარიშების წარდგენის ვადა უწევდათ 15 ივნისს და წარადგინეს დაგვიანებით, კერძოდ, მიმდინარე წლის 22 ივნისამდე, საქართველოს საგადასახადო კოდექსს 269-ე მუხლის მე-5 ნაწილის შესაბამისად, გათავისუფლდნენ სანქციისაგან დეკლარაციის დაგვიანებით წარმოდგენისათვის.
პირები, რომლებსაც მიმდინარე წლის 15 ივნისამდე უწევდათ მიმდინარე გადასახადების გადახდა და გადაიხადეს დაგვიანებით, კერძოდ, მიმდინარე წლის 22 ივნისამდე, საქართველოს საგადასახადო კოდექსს 269-ე მუხლის მე-5 ნაწილის შესაბამისად, გადასახადის გადამხდელის მოთხოვნის შემთხვევაში, გათავისუფლდნენ საურავის დარიცხვისგან.
უწყების ცნობით, საგადასახადო კოდექსში შესული ცვლილებების თანახმად, საშემოსავლო გადასახადისგან თავისუფლდება 2015 წლის 13-14 ივნისს, ქ. თბილისში მომხდარი სტიქიის შედეგად დაზარალებული ფიზიკური პირის მიერ ფინანსური ინსტიტუტისგან სასესხო ვალდებულების პატიების შედეგად მიღებული სარგებელი და 2015 წლის 14 ივნისიდან - 2016 წლის 1 იანვრამდე პერიოდში საქონლის/მომსახურების უსასყიდლოდ მიღების შედეგად წარმოშობილი სარგებელი. ამასთან, სტიქიის შედეგად დაზარალებული ფიზიკური პირების სიას ადგენს ქალაქ თბილისის მუნიციპალიტეტის მთავრობა.შეტანილ იქნა ცვლილება „კონტროლის განმახორციელებელი პირის შერჩევისა და საგადასახადო კონტროლის განხორციელების, მიმდინარე კონტროლის პროცედურების ჩატარების, სასაქონლო-მატერიალურ ფასეულობათა ჩამოწერის, საგადასახადო დავალიანების გადახდევინების უზრუნველყოფის ღონისძიებების განხორციელების, სამართალდარღვევათა საქმისწარმოების წესის დამტკიცების თაობაზე“ საქართველოს ფინანსთა მინისტრის 2010 წლის 31 დეკემბრის №994 ბრძანებაში, რომლის თანახმად, ქ. თბილისში 2015 წლის 13-14 ივნისს მომხდარი სტიქიის შედეგად დაკარგული, გადასახადის გადამხდელის სასაქონლო-მატერიალური ფასეულობები საგადასახადო ორგანოს მიზნებისთვის ჩაითვალოს ჩამოწერილად, თუ სტიქიის ზონაში საქმიანობის განმახორციელებელი გადასახადის გადამხდელი, არა უგვიანეს 2015 წლის 15 ივლისისა, განცხადებით (რომელშიც აღინიშნება პირის დასახელება/სახელი და გვარი/საიდენტიფიკაციო ნომერი) მიმართავს საგადასახადო ორგანოს და წარუდგენს ნუსხას დაკარგული სასაქონლო-მატერიალური ფასეულობების შესახებ, სააღრიცხვო დოკუმენტაციაში მითითებული სახეობის, რაოდენობის, ერთეულის ფასის და მთლიანი ღირებულების აღნიშვნით.
საგადასახადო კოდექსის 205-ე მუხლის მე-3 და მე-4 ნაწილების მიხედვით: საწარმო/ორგანიზაცია ქონებაზე გადასახადს იხდის მიმდინარე გადასახდელის სახით, გასული საგადასახადო წლის წლიური გადასახადის ოდენობით, არა უგვიანეს საგადასახადო წლის 15 ივნისისა. თუ ქონებაზე ქონების გადასახადში მიმდინარე საგადასახადო წლის მოსალოდნელი საგადასახადო ვალდებულების ოდენობა, მათ შორის, საგადასახადო შეღავათების გათვალისწინებით, არანაკლებ 50 პროცენტით მცირდება გასულ საგადასახადო წელთან შედარებით და აღნიშნულის შესახებ გადასახადის გადამხდელი, არა უგვიანეს მიმდინარე წლის 1 ივნისისა, აცნობებს შესაბამის საგადასახადო ორგანოს, გადასახადის გადამხდელს უფლება აქვს, შეამციროს ან საერთოდ არ გადაიხადოს მიმდინარე გადასახდელის თანხა.
აღნიშნულიდან გამომდინარე, იმ პირებს, რომელთა საგადასახადო ვალდებულება მცირდება არანაკლებ 50 პროცენტით წინა საგადასახადო წელთან შედარებით (სტიქიის გამო) და აღნიშნულის შესახებ გადასახადის გადამხდელი, არა უგვიანეს მიმდინარე წლის 1 ივლისისა, აცნობებს შესაბამის საგადასახადო ორგანოს, მიეცეთ უფლება შეამცირონ ან საერთოდ არ გადაიხადონ მიმდინარე გადასახდელის თანხა.
აღსანიშნავია, რომ დაწესებული შეღავათებით დღემდე, ინდივიდუალური მომართვის საფუძველზე, უკვე ისარგებლა რამდენიმე კომპანიამ. შემოსავლების სამსახური კვლავაც განიხილავს 2015 წლის 13-14 ივნისის სტიქიით დაზარალებულთა განცხადებებს.
