ოკუპაციის ხაზთან ე.წ. „საზაზღვრო ბანერის“ ჩამოგდებამ პარლამენტის ყოფილ წევრ ხათუნა ხოფერიას „ფანდარასტის“ პერიოდი გაახსენა. როგორც ხათუნა ხოფერიამ „რეაქციის“ ეთერში განაცხადა, „ჩვენ 9 წლის განმავლობაში გვაჩვევნდენ სპექტაკლიზირებულ პოლიტიკას“.
„ის, რაც ხდება დღეს, მაგონებს იმ პერიოდს, ყველა რომ „ფანდარასტს“ მღეროდა. ჩვენ 9 წლის განმავლობაში გვაჩვევდნენ სპექტაკლიზირებულ პოლიტიკას. გამოდიან [ხურვალეთის] მაცხოვრებლები და ამბობენ, რომ თავი გაგვანებეთო, მოსავალი გვაქვს ასაღებიო. ჩვენ იმდენი ვიმღერეთ „ფანდარასტი“ და წლების განმავლობაში ისე შევქმენით „ფანდარასტული“ პოლიტიკა, რომ საბოლოო ჯამში ათასობით ოჯახი გავაუბედურეთ, ათსობით ადამიანი დავტოვეთ უსახლკაროდ. მთელი მსოფლიოს პრობლემაა რუსეთი და ყველა ვექტორი მიდის რუსეთისკენ. საერთო პოლიტიკური კონტექსტიდან ამოგლეჯილად ჩვენ თუ დავიწყეთ ქმედებებს და გავაგრძელებთ ისევ იმ 9–წლიან „ფანდარასტულ“ პოლიტიკას, ან ძალიან სასაცილოები გავხდებით, ან ისეთები გავხდებით, როგორებიც ვიყავით 2008 წლის აგვისტოში“, – განაცხადა ხათუნა ხოფერიამ.
