თბილისის მუნიციპალიტეტის საკრებულოს ადამიანის უფლებათა დაცვისა და სამოქალაქო ინტეგრაციის კომისიის თავმჯდომარემ გულიკო ზუმბაძემ კომისიის სამდივნოს თანამშრომლებთან ერთად მძიმე საკრედიტო ვალდებულებაში მყოფი არასრულწლოვნების - ნოდარ და საბა ბერიაშვილების ოჯახი მოინახულა. დეპუტატმა ბერიაშვილების საცხოვრებელი სახლი დაათვალიერა და არასრულწლოვნების პრობლემებს ადგილზე გაეცნო.
მან ოჯახის მდგომარეობის შესახებ ძმების მეურვესთან ნანა მახარობლიძესთან ისაუბრა და მას თავისი კომპეტენციის ფარგლებში დახმარებას დაპირდა. გულიკო ზუმბაძემ ბერიაშვილებს საჩუქრები მიუტანა.
„არასრულწლოვანი ძმების დახმარება მათი პრობლემების საბოლოო მოგვარებამდე გაგრძელდება. საკრებულოს ადამიანის უფლებათა დაცვისა და სამოქალაქო ინტეგრაციის კომისიამ ბერიაშვილების ოჯახთან დაკავშირებით უკვე მიმართა მიკროსაფინანსო ორგანიზაციასა და გამგეობას. მინდა ავღნიშნო, რომ სწორი მიმართულებით წავედით, როდესაც პრობლემა გავასაჯაროვეთ. ჩვენი წერილის შემდეგ მიკროსაფინანსო ორგანიზაცია ოჯახს დაუკავშირდა და ჯარმების და დარიცხული პროცენტების გაუქმებას დაპირდა“, - განაცხადა გულიკო ზუმბაძემ და აღნიშნა, რომ ოჯახს ფინანსური სირთულეების გარდა სხვა საყოფაცხოვრებო პრობლემებიც გააჩნია, რომლის მოგვარების მიმართულებითაც კომისია მუშაობას კვლავაც გააგრძელებს.
კომისიის თავმჯდომარემ ისიც აღნიშნა, რომ მსგავს შემთხვევებში არასრულწლოვანთა ინტერესების დაცვის მიზნით მუშაობა საკანონმდებლო ინიციატივის თაობაზე მიმდინარეობს.
მშობლების გარდაცვალების შემდეგ, არასრულწლოვან ძმებს დედის მიერ აღებული საკრედიტო ვალდებულების დაფარვას მიკროსაფინანსო ორგანიზაცია სთხოვს.
