2008-2009 წლებში დევნილებისთვის აშენებული კოტეჯების რეაბილიტაცია მიმდინარე წლის 27 სექტემბერს დასრულდება. დევნილთა სამინისტროს ინფორმაციით, სარეაბილიტაციო სამუშაოებს ტენდერში გამარჯვებული კომპანია შპს „თიდა“ აწარმოებს.
სუბარის უწყებაში აცხადებენ, რომ 2008 წლის ომის შემდეგ, ევროკავშირმა საქართველოს დასახმარებლად 4,5 მილიარდი დოლარი გამოყო, რომლის ნაწილი დევნილთა განსახლების უზრუნველყოფას უნდა მოხმარებოდა, თუმცა დევნილი მოსახლეობის მხოლოდ 1/3-ია საცხოვრებლით უზრუნველყოფილი და პრობლემა დღესაც მწვავედ დგას.
,,გორის რაიონის სხვადასხვა სოფლებში ნაჩქარევად და უხარისხოდ აშენდა კოტეჯები, სადაც დევნილები სასწრაფო წესით შეასახლეს. ამ უხარისხო მშენებლობის შედეგების გამოსწორება დღეს ხდება. 2008-2009 წლებში აშენებული კოტეჯების დიდი ნაწილი საჭიროებს რეაბილიტაციას, რათა დევნილი ოჯახებისათვის იქ ცხოვრება შესაძლებელი იყოს”, - აცხადებენ უწყებაში.
ოკუპირებული ტერიტორიებიდან იძულებით გადაადგილებულ პირთა განსახლებისა და ლტოლვილთა მინისტრმა სოზარ სუბარმა, მინისტრის მოადგილემ მამუკა ცოტნიაშვილმა და შიდა ქართლის გუბერნატორის მოადგილემ გურამ მაჭარაშვილმა კარალეთის დევნილთა ჩასახლებაში კოტეჯების სარეაბილიტაციო სამუშაოები დღეს მოინახულეს.
დევნილთა და განსახლების სამინისტრო თიღვის, ერედვისა და ქურთის მუნიციპალიტეტების თანადაფინანსებით 215 კოტეჯის სარეაბილიტაციო სამუშაოებს აწარმოებს.
კარალეთის, სკრას, ხურვალეთისა და თელიანის დევნილთა ჩასახლებებში იატაკის აღდგენა-რეაბილიტაციის სამუშაოები ჩატარდება, ხოლო სოფელ დოღლაურაში მოხდება სახურავების რეაბილიტაცია.
