საზედამხედველო სააგენტოს ეროვნული ბანკიდან გამოყოფის შემთხვევაში, "საბანკო ასოციაცია" საბჭოში ერთი წევრის შეყვანას ითხოვს. ამის შესახებ განცხადება, პარლამენტის ოთხი კომიტეტის გაერთიანებულ სხდომაზე, ,,საბანკო ასოციაციის” პრეზიდენტმა ზურაბ გვასალიამ გააკეთა.
მისი თქმით, არ აპირებს სებ-ის გაყოფის საკითხზე პოლიტიკური განცხადება გააკეთოს.
,,ჩვენ თავდაუზოგავად ვიმუშავეთ, რომ ამ კანონპროექტს მიეღო ნორმალური სახე და ჩვენი შენიშვნები და წინადადებები წარვუდგინეთ კანონპროექტის ინიციატორებს. ვთვლით, რომ როგორც მთავრობას, ეროვნულ ბანკსა და პარლამენტს, კომერციული ბანკებისთვისაც ყველაზე მინიმალურია ის ერთი კაცი, რომელიც ჩვენ შეიძლება საბჭოში წარვადგინოთ და არავითარ ინტერესთა კონფლიქტს აქ ადგილი არ ექნება. თუ ამას არ მოგვცემთ, არც ეს იქნება პრობლემა", - განაცხადა გვასალიამ.
მას მიაჩნია, რომ საბჭოს მიერ წარდგენილი წევრი პარლამენტმა უნდა დაამტკიცოს და უფლებამოსილების ამოწურვის შემდეგ, ერთი წლის განმავლობაში, საფინანსო სექტორში მუშაობის უფლება არ ჰქონდეს, სახელფასო სარგო კი შეუნარჩუნდეს.
ეროვნული ბანკიდან საზედამხედველო ფუნქციის გამოყოფასთან დაკავშირებულ კანონპროექტს დარგობრივი ეკონომიკისა და ეკონომიკური პოლიტიკის, საპროცედურო საკითხთა და წესების, საფინანსო-საბიუჯეტო და იურიდიულ საკითხთა კომიტეტების გაერთიანებულ სხდომაზე განიხილავენ.
