საქართველოს წითელი ჯვრის საზოგადოების ინიციატივით, 13-14 ივნისს სტიქიით დაზარალებულებისთვის თანხების შეგროვების კამპანია დაიწყო, რომელიც ვებ-პლატფორმა Ammado.com-ზე მიმდინარეობს.
კამპანიაში მონაწილეობა ყველა ადამიანსა თუ კომპანიას შეუძლია, რომლებსაც ამის სურვილი აქვთ. მსურველები საქართველოს წითელი ჯვრის საზოგადოების ვებ გვერდს www.redcross.ge-ს უნდა ეწვიონ.
„Ammado“ უნიკალური გლობალური პლატფორმაა, რომელიც საშუალებას იძლევა, მსოფლიოს ნებისმიერი წერტილიდან ინტერნეტის მეშვეობით არამომგებიანი ორგანიზაციებისათვის, რომლებიც, თავის მხრივ, საჭიროების მქონე ადამიანებს დაეხმარებიან, თანხები შეგროვდეს.
ფულადი გადარიცხვები შესაძლებელია 75 სახის ვალუტაში, 20-ზე მეტი გადახდის მეთოდის გამოყენებით. დონაციის პლატფორმას სასურველი ენის შერჩევის ვარიანტიც გააჩნია.
ცოტა ხნის წინ „Ammado“-მ მომხმარებლებს შესთავაზა ახალი შესაძლებლობა, რომლის მიზანია კატასტროფის დადგომიდან რამდენიმე წუთში დაიწყოს თანხის მოძიების კამპანია და შეგროვდეს თანხები სპეციალურად სტიქიით დაზარალებული ადამიანებისათვის. აღნიშნული სიახლე წითელი ჯვრისა და წითელი ნახევარმთვარის საზოგადოებების მუშაობის პრინციპებსა და მეთოდიკას ითვალისწინებს.
ვებ-პლატფორმაზე ფონდის მოძიებისა და შეგროვების პროცედურა გამჭვირვალეა. ყველა შემომწირველს აქვს საშუალება მიუთითოს შემოწირული თანხა, საკუთარი ან კომპანიის სახელი. ასევე ვებ-პლატფორმის სტუმრებს შესაძლებლობა აქვთ თვალი ადევნონ კამპანიის მსვლელობას, აკონტროლონ თანხები და შემომწირველების ვინაობა.
შემოწირული თანხები ამ კომპანიის ანგარიშზე გროვდება და თვეში ერთხელ საქართველოს წითელი ჯვრის საზოგადოების შემოწირულობის ანგარიშზე ირიცხება.
13-14 ივნისს თბილისში მოვარდნილი ღვარცოფის შედეგად 19 ადამიანი დაიღუპა, 3 დაკარგულად ითვლება. რამდენიმე ასეული ოჯახი უსახლკაროდ დარჩა. ისინი დროებით თავშესაფრებში არიან გადაყვანილი და მუდმივად საჭიროებენ საკვებით, მედიკამენტებით, პირველად მოხმარებისა და ჰიგიენის საშუალებებით უზრუნველყოფას. ამ ეტაპზე დაზარალებულ ოჯახებს ამის საშუალება არ გააჩნიათ.
