სახელმწიფო უსაფრთხოებისა და კრიზისების მართვის საბჭო თბილისში მომხდარი სტიქიის შემდეგ არსებული ვითრების შესახებ განცხადებას ავრცელებს.
განცხადების თანახმად, 13 ივნისის სტიქიის შედეგად დაღუპულთა და დაკარგულთა რაოდენობა უცვლელია. გარდაცვლილია - 19, ხოლო უგზო-უკვლოდ დაკარგულია 3 ადამიანი.
ამ დროისთვის, ზოოპარკის ადმინისტრაციის განცხადებით, კვლავ დაკარგულად ითვლება ერთი ვეფხვი და ერთი ზოლიანი აფთარი.
21 ივნისის 19:00 საათიდან ამ დრომდე შსს საგანგებო სიტუაციების მართვის ცენტრში შევიდა 25 გამოძახება სხვადასხვა ადგილზე მტაცებელი ცხოველის დაფიქსირების შესახებ. ყველა შეტყობინებაზე მოხდა სათანადო რეაგირება, თუმცა არცერთი არ დადასტურდა.
სახელმწიფო უსაფრთხოებისა და კრიზისების მართვის საბჭო მოსახლეობას კიდევ ერთხელ მოუწოდებს მაქსიმალური სიფხიზლისა და ყურადღებისკენ, ასევე შეახსენებს, რომ საჭიროების შემთხვევაში დაუკავშირდნენ 112-ს.
უწყების ცნობით, მზიურის ტერიტორიაზე მუშაობს 279 მეხანძრე-მაშველი და შინაგან საქმეთა სამინისტროს განსაკუთრებულ დავალებათა დეპარტამენტის 110 თანამშრომელი.
დღეს, 07:00 საათის შემდეგ მზიურის ტერიტორიიდან გატანილია დახლოებით 800 მ3 ნატანი მასალა. ტერიტორიაზე სტიქიის შედეგად დაგროვილი წყლის ამოტუმბვა მთელი ღამის განმავლობაში მიმდინარეობდა. მზიურის ტერიტორიაზე სამუშაოები 24 საათიან რეჟიმში გრძელდება.
ზოოპარკის ტერიტორიაზე მუშაობს მძიმე სამშენებლო ტექნიკა, 150 სამხედრო-მოსამსახურე და ქ.თბილისის მერიის 35 თანამშრომელი. მიმდინარეობს სტიქიის დროს დაზიანებული ვოლიერების დემონტაჟი. ასევე, გრძელდება ტერიტორიის გაწმენდა.
წყნეთის ქუჩის მიმდებარედ აქტიურად გრძელდება ნაპირსამაგრი სამუშაოები. უკვე ჩასხმულია 12 ხიმინჯი. დღის ბოლომდე ჩაისხმება კიდევ 4 ხიმინჯი.
გაწმენდითი სამუშაოები აქტიურად მიმდინარეობს სტიქიით დაზიანებულ ყველა ლოკაციაზე. პროცესში ჩართულია შესაბამისი სამსახურები - მობილიზებულია ყველა სახის საჭირო სპეცტექნიკა.
სოფლის მეურნეობის სამინისტროს სსიპ “სურსათის ეროვნული სააგენტო“ სტიქიით დაზიანებულ ლოკაციებზე სადეზინფექციო სამუშაოებს ატარებს. დეზინფექცია პრევენციული ხასიათისაა და სტიქიის შემდეგ ინფექციის შესაძლო გავრცელების თავიდან აცილებას ისახავს მიზნად.
სამუშაოები სპეციალური სამანქანო დანადგარებით და მექანიკური ზურგსაკიდი აპარატების მეშვეობით ხორციელდება. სადეზინფექციოდ გამოიყენება კორსოლინის ხსნარი, რომლითაც მუშავდება სვანიძის ქუჩის, ზოოპარკის, მზიურისა და ლაგუნა ვერეს მიმდებარე ტერიტორიები.
სოფლის მეურნეობის სამინისტროს სპეციალისტების განმარტებით, კორსოლინი აბსოლუტურად უსაფრთხოა როგორც ადამიანთა ჯანმრთელობისთვის, ასევე - გარემოსთვის. აღნიშნული ხსნარი ფართოდ გამოიყენება მსოფლიოში სხვადასხვა დანიშნულებით - მათ შორის სტიქიის სალიკვიდაციო ღონისძიებების დროს
