ხვალ, 25 მაისს პარლამენტში, ნაფიც მსაჯულთა შერჩევის ახალ წესზე იმსჯელებენ. საკითხის განხილვა ადამიანის უფლებათა დაცვისა და სამოქალაქო ინტეგრაციის კომიტეტის სხდომაზე 10:30 საათზეა ჩანიშნული. დეპუტატების წინაშე მოხსენებით კანონპროექტის ინიციატორი საპარლამენტო უმრავლესობის წევრი გედევან ფოფხაძე წარსდგება.
კანონპროექტის განმარტებით ბარათში მითითებულია, რომ საქართველო-ევროკავშირს შორის დადებული ასოცირების შესახებ შეთანხმების დღის წესრიგის მიზანია „ასოცირების შესახებ შეთანხმების“ განხორციელებისთვის მომზადებისა და მისი ეფექტიანი იმპლემენტაციის ხელშეწყობა. აღნიშნული დოკუმენტის მე-2 მუხლში ერთ-ერთ პრიორიტეტულ სფეროდ მითითებულია მართლმსაჯულების სექტორისა და სისხლის სამართლის საპროცესო კანონმდებლობის, მათ შორის, „ნაფიც მსაჯულთა სასამართლოს რეფორმა განსჯადობის, ნაფიც მსაჯულთა შერჩევისა და ვერდიქტების დასაბუთებულობის უზრუნველყოფის ნაწილში“.
სასამართლო პრაქტიკის განზოგადების შედეგად ირკვევა, რომ სასამართლო პროცესის გაჭიანურება ხშირ შემთხვევაში ნაფიც მსაჯულთა შერჩევის პროცესის სირთულითა და მისი არაგონივრული გაჭიანურებითაა განპირობებული. ნაფიც მსაჯულთა შერჩევის პროცედურა დაახლოებით 5-დან 8-მდე შერჩევის სხდომას საჭიროებს და 1 თვეზე უფრო ხანგრძლივ პერიოდს მოიცავს, რაც უარყოფით გავლენას ახდენს ასევე ნაფიც მსაჯულთა მოტივაციასა და მიუკერძოებლობაზე.
კანონპროექტი შემდეგ ცვლილებებს ითვალისწინებს: ნაფიც მსაჯულთა შერჩევის სხდომაზე მოსამართლეს ეძლევა შესაძლებლობა შეკითხვის დასასმელად და დასმულ შეკითხვაზე პასუხის გასაცემად მხარეებს და მსაჯულობის კანდიდატებს განუსაზღვროს გონივრული ვადა; ნაფიც მსაჯულთა შერჩევის მეორე ეტაპზე 18 წელს მიღწეულ პირთა ერთიანი სიიდან, 30 კანდიდატის ნაცვლად, შეირჩევა იქნება მსაჯულობის 100 კანდიდატი; თუ წარდგენილი ბრალდება სასჯელის სახით ითვალისწინებს უვადო თავისუფლების აღკვეთას, თითოეული მხარე, ნაცვლად 12 დაუსაბუთებელი აცილებისა, ისარგებლებს 10 დაუსაბუთებელი აცილების განცხადების უფლებით.
კანონპროექტის თანხმად, თანახმადაც ნაფიც მსაჯულთა შერჩევის მეორე ეტაპზე 18 წელს მიღწეულ პირთა ერთიანი სიიდან, ნაცვლად 30 კანდიდატისა, ნაფიცი მსაჯულობის 100 კანდიდატი შეირჩევა, აღნიშნული ცვლილება კი სასამართლოს და მხარეებს მისცემს შესაძლებლობას ორი ან სამი პროცესის განმავლობაში დაასრულონ ნაფიც მსაჯულთა შერჩევა.
საქართველოს სისხლის სამართლის საპროცესო კოდექსის 221-ე მუხლის მე-10 და მე-11 ნაწილების თანახმად, იმ დანაშაულის საქმეზე, რომელიც სასჯელის სახით უვადო თავისუფლების აღკვეთას არ ითვალისწინებს, თითოეულ მხარეს გააჩნია 6 დაუსაბუთებელი აცილების განცხადების უფლება, ხოლო, თუ სასჯელის სახით უვადო თავისუფლების აღკვეთაა გათვალისწინებული - 12 დაუსაბუთებელი აცილების განცხადების უფლება. დამატებით, საქმეში ბრალდებულთა რაოდენობის მიხედვით, თითოეულ ბრალდებულს აქვს დამატებით 3 კანდიდატის დაუსაბუთებელი აცილების განცხადების უფლება. აცილების ამგვარი პროცედურა, თავის მხრივ, კიდევ უფრო მეტად უწყობს ხელს პროცესის გაჭიანურებას. ამდენად, მიზანშეწონილია, რომ 12 დაუსაბუთებელი აცილების ნაცვლად, მხარეებს ჰქონდეთ 10 დაუსაბუთებელი აცილების განცხადების უფლება.
კანონპროექტის თანახმად, ნაფიც მსაჯულთა შერჩევის სხდომაზე მოსამართლეს შეეძლება მხარეებს და ნაფიცი მსაჯულობის კანდიდატებს განუსაზღვროს გონივრული ვადა კითხვების დასასმელად და მათზე პასუხის გასაცემად.
