საქართველოს საგარეო საქმეთა მინისტრის თამარ ბერუჩაშვილის განცხადებით, ვიზალიბერალიზაციასთან დაკავშირებით, საქართველო დღეს ფინიშის ბოლო ეტაპზე იმყოფება.
,,დღეს ჩვენ ვიმყოფებით ფინიშის ბოლო ეტაპზე და ნამდვილად მხოლოდ ერთი ნაბიჯი დაგვრჩა გადასადგმელი იმ მიმართულებით, რომ ჩვენ მივიღოთ უკვე განცხადება საქართველოს მოქალაქეებისთვის უვიზო მიმოსვლასთან დაკავშირებით. გვაქვს კარგად შემუშავებული გეგმა, რას ნიშნავს ის ამოცანები, რაც უახლოესი თვეების განმავლობაში უნდა განვახორციელოთ. გვაქვს ევროპელი პარტნიორების მხარდაჭერა და მე ველი, რომ რიგის დეკლარაციაში მკაფიოდ ჩამოყალიბებული იქნება ის ვადა, რომლის ფარგლებშიც უნდა დასრულდეს ტექნიკური ამოცანები და ასევე მოწოდება, რომ უახლოეს დროს ევროკავშირის საბჭომ, ევროპარლამენტმა მიიღოს სპეციალური გადაწყვეტილება და საქართველოს მიმართ აამოქმედოს ის სპეციალური რეგულაცია, რომელიც განსაზღვრავს ჩვენი მოქალაქეებისთვის უვიზო მიმოსვლას”, - აღნიშნა მინისტრმა.
მისივე თქმით, რიგის სამიტით არ იწყება და არ მთავრდება საქართველოს ევროპეიზაციის ძალიან მნიშვნელოვანი პროცესი.
,,შესაბამისად, ჩვენი ძალისხმევა სწორედ მიმართულია იქეთკენ, რომ შესაძლებლობის ფარგლებში მივიღოთ მაქსიმალური მხარდაჭერა, მაქსიმალური თანადგომა, მაქსიმალური აღიარება და ამასთან ერთად, საქართველო გამოჩნდეს კვლავაც, როგორც ქვეყანა, რომელიც არის მოდელი რეგიონში საქართველოს ევროპული ტრანსფორმაციის” - აღნიშნა ბერუჩაშვილმა.
